Օկանագան բլրապատ սարահարթում (ԱՄՆ Վաշինգտոն նահանգի եւ Կանադայի Բրիտանական Կոլումբիա նահանգի սահման) հետազոտություններ իրականացնող հնէաբանները հայտնաբերել են հնագույն ճպուռների մի քանի տեսակների մնացորդներ: Խոսքը միջատների մասին է, որոնք բնակվել են վաղ էոցենում, այսինքն՝ մոտ 50 մլն տարի առաջ, փոխանցում է Planet- today-ը:
Գիտնականներ Բրյուս Արչիբալդը (Սայմոն Ֆրեյզերի համալսարան) եւ Ռոբերտ Քանինգսը (Բրիտանական Կոլումբիայի Թագավորական թանգարան) գտածոներն ուսումնասիրել են եւ պարզել, որ մնացորդները պատկանում են ճպուռների 8 տեսակի որոնք մինչեւ հիմա գիտական գրականության մեջ չեն նկարագրվել: Երկու տեսակի մնացորդները շատ վատ են պահպանվել, իսկ մնացյալ վեց մնացորդները կարելի է որպես նյութ օգտագործել հետազոտական աշխատանքի համար:
Միջատաբան Քանինգսը հստակեցնում է, որ միջատներին տրվել են լատինական անվանումներ՝ Idemlinea versatilis, Antiquiala snyderae, Ypshna brownleei, Auroradraco eos, Ypshna latipennata եւ Eoshna thompsonensis: Այս ճպուռները պատկանում են հիմնականում Aeshnidae խմբին, որը գոյություն ունի նաեւ հիմա:
«Խոսքն, այսպես կոչված, շերեփագի ճպուռների մասին է, որոնք ներկայումս տարածված են գործնականում ամբողջ երկրագնդում: Սրանք անչափ խոշոր եւ արագաշարժ ճպուռներ են, որոնք մոտ 400 տեսակ ունեն: Գտածոն հաստատում է, որ այս միջատները տարածված էին դեռեւս 50 մլն տարի առաջ»,- նշում են գիտնականները:
