Բրինձը մարդկության համար կարեւորագույն գյուղատնտեսական մշակաբույսերից է, այն հենց այնպես չէ, որ համարում են Երկրի բնակչության պարենային անվտանգության հիմքը։ Բայց վերջին տարիներին բրինձը վտանգվել է, ինչը պայմանավորված է կլիմայական փոփոխություններով՝ գլոբալ ջերմացումը բրինձը դարձնում է թունավոր, տեղեկացնում է Planet- today-ը։

Բրնձի բաղադրության մեջ մկնդեղ կա, բայց դրա խտությունն այնքան քիչ է, որ ոչ մի ազդեցություն մարդկային օրգանիզմի վրա չի ունենում։ Բայց ջերմաստիճանի բարձրացման պատճառով մկնդեղի խտությունը բրնձի մեջ սկսել է ավելանալ։ Սրան ուշադրություն են դարձրել ԱՄՆ գիտնականները։

Վաշինգտոնի համալսարանի աշխատակիցները կարծում են, որ գլոբալ ջերմացման հետագա աճը կարող է հանգեցնել նրան, որ բրնձի մեջ պարունակվող մկնդեղը չափից ավելի կդառնա։ Այդ դեպքում բրինձը կդադարի անվտանգ լինել առողջության համար։

«Մենք աճեցրել ենք բրինձ լաբորատոր պայմաններում, որոնք նման են եղել գլոբալ տաքացման պայմաններին։ Եվ ստացել ենք մկնդեղի վտանգավոր պարունակությամբ մթերք։ Ուստի, մարդկությունը պետք է հիմա արդեն մտածի, թե ինչպես պայքարի նոր սպառնալիքի դեմ։ Մենք վստահ ենք, որ իրավիճակը կարելի է շտկել նորարարական պարարտանյութերի օգնությամբ, որոնք բրինձը կազատեն մկնդեղի բարձր պարունակությունից»,- եզրափակել են հետազոտության հեղինակները։