Գերմանիայից հետազոտողները չափել են անտարկտիկական արշավախմբի անդամների գլխուղեղի ծավալը եւ զարմանքով հայտնաբերել, որ Անտարկտիդայում 14 ամիս անցկացնելուց հետո բեւեռախույզների ուղեղը նկատելիորեն փոքրացել է, հայտնում է The New England Journal of Medicine-ը:
Բեռլինի Մաքս Պլանկի մարդու զարգացման ինստիտուտի աշխատակիցները, որոնց խումբը ղեկավարել է Սիմոնա Կյունը, հետազոտել են 9 բեւեռախույզների ուղեղը (5 տղամարդու եւ 4 կնոջ), որոնք նախքան դա 14 ամիս ապրել էին Նեյմայեր-3 անտարկտիկական կայանում: Մասնակիցներից ութին ՄՌՏ են կատարել նաեւ մինչեւ Անտարկտիդա մեկնելը:
Արշավից առաջ եւ հետո արդյունքները համեմատելով՝ գիտնականները հայտնաբերել են հետազոտության բոլոր մասնակիցների ուղեղի ծավալի զգալի կրճատում: Ամենալուրջ փոփոխությունները կատարվել էին, այսպես կոչված, ատամնավոր գալարում՝ սա հիպոկամպի հատվածն է, որը կարեւոր դեր ունի նեյրոգենեզում (այսպես կոչված նոր նեյրոնների առաջացման պրոցես):
«Բեւեռախույզների ատամնավոր գալարը սեղմվել էր միջինը 7 տոկոսով: Այս փաստը համահարաբերակցվում է ուշադրության եւ տարածական կողմնորոշման թեստերի արդյունքներին: Նրանց օրգանիզմում եւս մեկ փոփոխություն էր ուղեղի նեյրոտրոֆիկ գործոնի կրճատումը, որը պատասխանատու է նեյրոնների կիսվելու համար»,- ասել է Կյունը՝ նշելով, որ բեւեռախույզների ուղեղում բացասական փոփոխությունները կարող են պատճառաբանվել սոցիալական մեկուսացմամբ: