Բոլորս էլ եկել ենք անցյալից, ոչ մեկս չենք եկել ապագայից, հետեւաբար, մենք ունենք մեր պատկերացումները, սոցիալական հարցերին մոտենալու մեր տարբերակները, մեր դաստիարակվածությունը, սխալներ թույլ տալու մեր բազան: Այս մասին ԱԺ-ում լրագրողների հետ զրույցում նշեց «Իմ քայլը» խմբակցության պատգամավոր Հովիկ Աղազարյանը՝ անդրադառնալով ԿԳՄՍ փոխնախարար Գեւորգ Լոռեցյանի ձերբակալությանը:
«Որեւէ մեկն ասե՞լ է, որ իշխանությունը բացառում է, որ իր ներկայացուցիչների մեջ լինեն այդպիսի տարրեր: Խնդիրն այն է, թե իշխանությունն ինչ արձագանք է տալիս նման երեւույթներին: Հենց այն հանգամանքը, որ Կոռուպցիայի կանխարգելման հանձնաժողովի նախագահ է ընտրվել «Լուսավոր Հայաստանի» ներկայացրած թեկնածուն, դա չի՞ նշանակում արդյոք, որ իշխանությունները շատ լուրջ են վերաբերվում այդ խնդրին:
Լոռեցյանն իմ երիտասարդ ընկերներից է եւ ինձ համար շատ ցավալի է, եթե հանկարծ հաստատվի իրեն ներկայացված մեղադրանքը: Ես հույս եմ փայփայում, որ ինչ-որ բան այնպես չէ»,-ասաց նա:
