Մեքսիկացի հեղափոխական Էմիլիանո Սապատոյին մերկ եւ կանացի դիրքով պատկերող նկարը վրդովեցրել է նրա սերունդներին եւ ստիպել է մոտ 100 ֆերմերների արգելափակել այն շենքի մուտքը, որտեղ ցուցադրվում է աշխատանքը, հայտնում է AP-ը։
Նկարում պատկերված է ձիուն նստած մերկ Սապատոն՝ բարձրակրունկ կոշիկներով եւ վարդագույն լայնեզր գլխարկով։
Սապատոյի թոռը հայտարարել է, որ նկարը պետք է հեռացվի, կամ իրենք դատի կտան։ «Մենք թույլ չենք տա դա։ Մեզ համար, որպես հարազատների, դա սեւացնում է մեր գեներալի կերպարը, որը միասեռականի տեսքով է պատկերված»,- ասել է Խորխե Սապատո Գոնսալեսը։
Միաժամանակ շենքի մոտ տեղի է ունեցել ակցիա՝ ի պաշտպանություն սեռական փոքրամասնությունների։ Երկու խմբերի միջեւ ծեծկռտուք է սկսվել։
«Դա մտքերի արտահայտման ազատություն չէ, դա այլասերվածություն է․․․ դա նվաստացուցիչ է։ Նրանք չեն կարող մեր պատմությունը նման կերպ ներկայացնել»,- ասել է ցուցարարներից մեկը։ Նրանք կառավարությունից հարգանք են պահանջել մեքսիկական պատմության «մեծ սրբապատկերների» հանդեպ։
Ցուցահանդեսի կազմակերպիչ Լուիս Վարգասը նշել է, որ աղմուկն ավելի շատ այցելուների է բերել։
Պորֆիրիո Դիասի բռնակալության դեմ 1910թ․ մեքսիկական հեղափոխության առաջնորդ Էմիլիանո Սապատո Սալասարը ապստամբած գյուղացիների առաջնորդն էր։ Նա Մեքսիկայի ազգային հերոսներից է։