News
Լրահոս
News
Երեքշաբթի
Մարտ 19
Տեսնել լրահոսը

Պաշտպանության բանակի հյուսիս-արևելյան ուղղությամբ տեղակայված զորամասերից մեկի պահպանության տեղամասում հրազենային վիրավորումից մահացած Արթուր Աջամյանի իրավահաջորդը՝ պապիկն է լրացուցիչ հարցաքննվել։ Այս մասին NEWS.am-ին հայտնեց իրավահաջորդի ներկայացուցիչ, փաստաբան Հայարփի Սարգսյանը։

«Նշանակվել են մի շարք փորձաքննություններ։ Մեզ ներկայացվեցին դրանք վերաբերյալ կայացված որոշումները, մասնավորապես՝ դատաբժշկական, դատակենսաբանական, դատագենետիկական, դատահետքաբանական, դատաձգաբանական համալիր փորձաքննությունների որոշումներ»,-նշեց նա:

Փաստաբանը հայտնեց, որ ՀՀ ՊՆ կենտրոնական զինվորական կլինիկական հոսպիտալում այցելել է նույն տեղամասում վիրավորում ստացած Դավիթ Մելիքբեկյանին․ «Դավիթ Մելիքբեկյանի վիճակը շարունակում է մնալ ծայրահեղ ծանր, որոշակի փոփոխություններ ամեն պահի տեղի են ունենում, բայց վիճակը գնահատվում է, ընդհանուր առմամբ, ծայրահեղ ծանր, հարազատների հետ չհաջողվեց հանդիպել, քանի որ իրենք արդեն հիվանդանոցում չէին, վաղը կրկին այցելելու եմ, արդեն հարազատներին տեսնելու նպատակով»,-նշեց նա։

Փսատաբանը հակված է հավատալ սպանության վարկածին․ «Ես հակված եմ հավատալ, որ առաջինը սպանվել է Արթուր Աջամյանը, ինչից հետո վիրավորվել է Դավիթ Մելիքբեկյանը։ Դատելով վնասվածքներից այդ վարկածին եմ հակված հավատալ։ Արթուրի վնասվածների դեպքում՝ ճակատային հատվածում վերևից ներքև ուղղությամբ, դժվարանում եմ հավատալ, որ տեսականորեն հնարավոր է, որ մարդն ինքն իրեն նման վնասվածք կարողանա պատճառել, ընդհանրապես հավանականություն չկա, իսկ վիրավորի վնասվածքների մասով ես այլ կարծիքներ ունեմ, ոտքից է վիրավոր և դեմքից, ուստի հակված եմ մտածել, որ նախ Արթուրին են սպանել, ապա վիրավորել են Դավիթ Մելիքբեկյանին»։

Հայարփի Սարգսյանը կարծում է, որ խմբակային հանցագործություն է տեղի ունեցել, կան մասնակից երրորդ անձ կամ անձինք․ «Քանի որ մեկը խրամատում է գտնվել, մյուսը խրամատից մոտ 200 մետր հեռավորության վրա, հետևաբար բացառվում է այն վարկածը, որ մեկ հոգին կարողանար 200 մետրի վրա այդպիսի վնասվածնքեր պատճառել։ Այստեղ խմբակային հանցագործություն է տեղի ունեցել»։

Փաստաբանը անդրադարձավ նաև պաշտպանության փոխնախարար Գաբրիել Բալայանի այն հայտարարությանը, որ բռնաբարության դեպքը, որի մասին խոսել էր փաստաբանը, չի հիմնավորվել, բացի այդ խոսքը մարտական փայլուն ուղի ունեցող զորամասի մասին է․

«Լսեցի, որ պատրաստակամ են կազմակերպել, որ գնամ, տեսնեմ զորամասը, իսկ ես պատրաստ եմ փոխնախարարին ցույց տալ այն քրեական գործերը, որ ինձ մոտ առկա են, և այն պնդումը, թե սեռական բռնությունը չի հիմնավորվել, ոչ պատասխանատու հայտարարություններ են, 5 քրեական գործ միայն սեռական բռնության մասով են հարուցված, այսինքն՝ դեռևս նախաքննության փուլ է, և միջամտելը քրեական գործին Պաշտպանության նախարարության կողմից, կարծում եմ, տեղին չէ և նույնիսկ անօրինական է, իսկ յուրաքանչյուր զինվոր մեզ համար հերոս է, բոլոր զորամասերում մենք ունենք հերոսներ, բայց սա բերել կապել քրեական գործի հետ և զորամասում տեղի ունեցած դեպքերի հետ տեղին չէ, հերոսի զորամասը հիշատակելով չենք կարող կոծկել այդտեղ տեղի ունեցած հանցագործությունները»։

Իսկ վիրավորի մասին ապատեղեկատվություն տարածելու մասին փոխնախարարի հայտարարությանն ի պատասխան Հայարփի Սարգսյանն ասաց, որ իրեն Քննչական կոմիտեից են հայտնել, որ Ստեփանակերտի հոսպիտալում է վիրավոր զինվորը․ «Եվ հետո զարմանում եմ իրենց արձագանքի վրա, ի՞նչ կապ ունի դա քրեական գործի հետ»։

Անդրադառնալով իր այն հայտարարությանը, որ Արթուր Աջամյանը իր հարազատներից մեկին ասել է՝ «ում ուզում են սպանել, տանում են, դիրքերում են սպանում», նա ասաց, որ դա խոսում է զորամասում տիրող իրավիճակի, բարքերի մասին, որոնք պատշաճ զինվորական ծառայության հետ աղերս չունեն․ «Այո, խոսքը նաև դիրքերում տեղի ունեցող անօրինակությունների մասին է, որ լսել է Արթուր Աջամյանը, միանշանակ հենց այնպես չի ասել»։

Փաստաբանը մտավախություններ ունի, որ ՊՆ-ն չի ցանկանում բացահայտել տեղի ունեցածը․ «Ես արդեն տեսնում եմ՝ հող են նախապատրաստում, որ ամբողջ մեղքը բարդեն Արթուր Աջամյանի վրա, ինքնասպանություն որակեն, քննչական գործողության մասնակցեցի և հարցադրումներ էին արված, որոնք այս պահին չեմ հրապարակի, բայց այդ հարցադրումներից ակնհայտ էր, որ ցանկանում են ինքնասպանություն որակել, իհարկե միջնորդություններ արեցի, որոշակի շտկումներ արվեցին։ Ես դա թույլ չեմ տա, եթե հարկ լինի, որևէ փորձագետի սխալ եզրակացություն չի անցնելու, ես կհրավիրեմ միջազգային փորձագետի, որովհետև արդեն իսկ պետք է վերացվեն այդ ապօրինությունները։ Այն, որ Քննչական կոմիտեի նկատմամբ ՊՆ-ն ազդեցություն ունի, ակնհայտ է։ Պն-ն փաստորեն մշտապես թելադրել է ՔԿ-ին»։

Իսկ թե որն է պատճառը, Հայարփի Սարգսյանը կարծիք հայտնեց՝ ՊՆ-ն պարզապես չի ցանկանում, որ բարձրաձայնվեն այն խնդիրները, որոնք կարող են իրենց անվան վրա ազդել․ «Իսկ եթե կա խնդիր, նրանք փորձում են թաքցնել։ ՊՆ-ն պատասխանատվություն է կրում ամեն խախտման համար, որ տեղի է ունենում զորամասերում և սա պաշտպանողական դիրք է»։

Փաստաբանի խոսքով՝ փորձագետների վրա էլ է ճնշում եղել, դրա համար ինքը ներկա է եղել և թույլ չի տվել որևէ միջամտություն։

Հիշեցնենք, որ հենց այս զորամասում օրեր առաջ՝ դեկտեմբերի 2-ին՝ ժամը 06:50-ի սահմաններում, ՊԲ N զորամասի պահպանության տեղամասի մարտական դիրքում մահացել էր պարտադիր ժամկետային զինծառայող Արթուր Իշխանի Աջամյանը եւ հրազենային վիրավորում ստացել պարտադիր ժամկետային զինծառայող Դավիթ Հարությունի Մելիքբեկյանը:

 

Տպել
Ամենաշատ