Նյու Ջերսիից աշակերտ Փիթեր Վեյը պատրաստել է քվադրոքոփթեր, որը բարձրացել է 100 մ բարձրության վրա 2.7 վայրկյանում: Այդ ձեռքբերումը գրանցվել է Գինեսի Ռեկորդների գրքում, հաղորդում է ՏԱՍՍ-ը՝ հղում կատարելով UPI-ին:
Վեյը սովորում է Պրինսթոնի՝ մաթեմատիկայի եւ բնական գիտությունների միջազգային դպրոցի 12-րդ դասարանում: Նրա անօդաչու թռչող սարքը գերազանցել է ռեկորդը, որը սահմանվել էր 2016 թվականին Գերմանիայից ինժեներ Դիրք Բրյուների կողմից: Վերջինիս դրոնը 100-մետրանոց բարձրությունը հաղթահարել էր 3.87 վայրկյանում:
Վեյն աշխատել է իր անօդաչու սարքի վրա երկու տարի շարունակ: «Նա անցկացրել է ֆիզիկական եւ մաթեմատիկական հաշվարկներ եւ հաստատել, որ այդ արագությունը կարող է լինել ավելին,-պարզաբանել է դպրոցի ընդունող հանձնաժողովի տնօրեն Յանգ Յանգը:-Իսկ կես տարվա ընթացքում նա աշխատել է քվադրոքոփթերի ֆունկցիոնալությունը կատարելագործելու ուղղությամբ»:
«Հնարավոր հետազոտական նախագծերը քննարկելիս իմ գիտական ղեկավար Ադամ Քեմփը համոզել էր ինձ փորձել գերազանցել համաշխարհային ռեկորդը: Եւ բազմաթիվ փորձերով բարդ աշխատանքից հետո ես կարողացա հասնել նպատակիս»,-ընդգծել է դպրոցականը, որը հրապարակել է դրոնի թռիչքի տեսանյութը սոցցանցերում:
«Երբ ես դեռ նորեկ էի այս դպրոցում, երբեք չէի մտածում, որ կկարողանամ հասնել այդ մակարդակին,-նշել է Վեյը:-Ինձ հետաքրքրում էր կոնստրուկտավորումը: Իմ գլխում ծագած գաղափարներն իրականություն դարձնելն ինձ համար թվում էր կախարդական ինչ-որ բան»,-հավելել է նա: Վեյը նաեւ նշել է, որ դարձել է մի շարք նորարարական ինժեներական նախագծերի հեղինակ դպրոցում վերջին տարիներին ուսանելու ընթացքում, որտեղ սովորում են միայն 9-12-րդ դասարանցիները:
