ՆԱՏՕ-ի տվյալներով՝ 2019թ․ դիտարկվում է «սառը պատերազմի» ժամանակներից վեր ռուսական սուզանավերի բարձր ակտիվության մասին։ Ռուսաստանն անընդհատ ընդլայնում է իր գործողությունները ջրի տակ, հայտարարել է Հյուսիսատլանտյան դաշինքի մամուլի քարտուղար Օանի Լունգեսկուն, հայտնում է DW-ը՝ հղում կատարելով Redaktionsnetzwerk Deutschland (RND)-ին։

Նրա խոսքերով՝ Նորվեգիայի ափերի մոտ հոկտեմբերին միայն մեկ գործողության ընթացքում միաժամանակ նկատվել են մինչեւ տասը ռուսական սուզանավեր։

ՆԱՏՕ-ն մտադիր է արձագանքել այդ գործողություններին, հայտարարել է Լունգեսկուն։ Մասնավորապես, դաշինքը ծրագրում է ուժեղացնել պարեկությունը Ատլանտյան օվկիանոսի հյուսիսային մասում։ Բացի այդ, կմեծացվեն ներդրումները օդից վտանգներին դիմակայելու ժամանակակից միջոցների մեջ։ ՆԱՏՕ-ի ներկայացուցիչը ընդգծել է, որ Հյուսիսային Ատլանտիկան «կենսական կարեւորության նշանակություն ունի Եվրոպայի անվտանգության համար» այն պատճառով, որ այնտեղով են անցնում մատակարարման ռազմական երթուղիները, քաղաքացիական առեւտրային ճանապարհները, ինչպես նաեւ կապի միջոցները։

RND-ի տեղեկատվության համաձայն, արեւմտյան զինվորականները աճող անհանգստությամբ են հետեւում ռուսական տեխնոլոգիաների զարգացմանը։ Վերջին ժամանակներս Ռուսաստանում արտադրված սուզանավերը զգալիորեն անձայն են, իսկ հրթիռները ավելի արագ են։

Այլ սցենարների հետ մեկտեղ, ՆԱՏՕ-ում քննարկվում է այն, որի դեպքում ռուսական սուզանավերը կարող են կտրել ԱՄՆ-ի եւ Եվրոպայի միջեւ ստորջրյա մալուխը, որով անցնում է ինտերնետ-կոմունիկացիաների մեծ մասը։ Նման կարգի գրոհները կարող են դիտարկվել որպես հիբրիդային պատերազմի մաս։