Թուրքիայի վարչապետ Ռեջեփ Թայիփ Էրդողանի գլխավորած «Արդարություն եւ զարգացում» կուսակցությունը հունիսի 12-ի խորհրդարանական ընտրություններին Էդիռնե նահանգից պատգամավորության թեկնածու է առաջադրել «Հզոր Թուրքիա» կուսակցության նախկին նախագահ հայ հանրությանը քաջածանոթ Թունա Բեքլեւիչին։
Թուրքական Hurriyet-ի փոխանցմամբ՝ Թունա Բեքլեւիչը հայտարարել է, թե «Արդարություն եւ զարգացում» կուսակցության պատգամավորների թեկնածուների ցուցակը շատ ուժեղ դեմքերով է համալրված։ «Այդ ցուցակում փորձառությունն ու երիտասարդությունը միացվել են իրար»,-ասել է Բեքլեւիչը։
Հիշեցնենք, որ ավելի վաղ NEWS.am-ը հայտնել էր, որ հոկտեմբերի 10-ի երեկոյան թուրքական բոլոր լրատվամիջոցները հայտնել էին, թե «Հզոր Թուրքիա» կուսակցության նախագահ Թունա Բեքլեւիչն իր համակիրների հետ, ի նշան բողոքի, խախտել են սահմանը եւ մտել Հայաստան։ Այնուհետ, Հայաստանում Ռուսաստանի Անվտանգության դաշնային ծառայության սահմանապահ վարչության պետի տեղակալ, գնդապետ Անդրեյ Գուզեեւը հերքել է թուրքական լրատվամիջոցների տարածած տեղեկությունը, թե մի քանի թուրք գործիչներ հատել են հայ-թուրքական սահմանը:
Այս դեպքից օրեր անց նրանք ժամանեցին Հայաստան եւ նույն օրը հրավիրվեցին ԱԱԾ։ Հայաստանի ԱԱԾ-ի կողմից հիշյալ դեպքի կապակցությամբ հաղորդագրություն էր տարածվել, որտեղ նշվել էր, թե Թունա Բեքլեւիչը եւ Բայբարս Օրսեքը հրավիրվել են ԱԱԾ պարզաբանումներ տալու, որտեղ նրանց զգուշացվել է, որ անընդունելի է նման վարքագիծն ու անպատասխանատու հայտարարություններ անելը եւ առաջարկվել թուրք գործիչներին լքել Հայաստանի տարածքը։