Չինաստանի կենտրոնական կառավարությունը երբեք եւ ոչ մի պատրվակով մյուս պետություններին թույլ չի տա միջամտել երկրի երկու հատուկ վարչական շրջանների՝ Հոնկոնգի եւ Մակաոյի ներքին քաղաքականությանը: Այս մասին հայտարարել է Չինաստանի նախագահ Սի Ցզինպինը, փոխանցում է ՏԱՍՍ-ը:
«Հայրենիքի հետ այս շրջանների վերամիավորումից հետո նրանց բոլոր գործերը դասվում են մեր երկրի ներքին հարցերին եւ արտասահմանից ոչ մեկին չի հաջողվի որեւիցե կանոն թելադրել,- շեշտել է նա՝ ելույթ ունենալով պաշտոնապես Չինաստանի կազմ Մակաոյի մտնելու 20-ամյակի առիթով: - Մենք ոչ մի պարագայում թույլ չենք տա, որ արտաքին ուժերը միջամտեն Հոնկոնգի եւ Մակաոյի գործերին»:
Սի Ցզինպինի խոսքով՝ Մակաոն մեծ առավելություն ունի, քանի որ այս քաղաքում օրգանապես համակցվում են արեւելյան եւ արեւմտյան մշակույթները: «Սա նպաստում է մշակութա-հումանիտար կապերի խորացմանը, հանգեցնում է մշակույթների փոխադարձ ներթափանցմանը»,- ընդգծել է Չինաստանի նախագահը: