Մարշալ Խալիֆա Խաֆթարի հրամանատարությամբ Լիբիայի ազգային բանակը 72 ժամ է տվել Լիբիայի Անցումային ազգային խորհրդի ղեկավար Ֆայեզ Սարրաջին Տրիպոլի եւ Սիրտ քաղաքները լքելու համար: Այս մասին ասվում է ազգային բանակի տարածած հաղորդագրության մեջ, հաղորդում է ՌԻԱ Նովոստին:
«Միսրատի ուղղությամբ հարվածներն էլ ավելի կուժգնանան եւ կշարունակվեն առանց դադարի, եթե խմբավորումները դուրս չբերվեն Տրիպոլիից եւ Սիրտից ամենաուշը 3 օրվա ընթացքում: Վերջնաժամկետն ավարտվում է կիրակի օրը գիշերը 00:00-ին»,- ասվում է հաղորդագրության մեջ:
2011 թվականին Լիբիայի նախագահ Մուամար Քադաֆիի տապալումից եւ սպանությունից հետո Լիբիան փաստացի դադարել է հանդես գալ որպես միասնական պետություն։ Այժմ երկրում երկիշխանություն է։ Արեւելքում ժողովրդի կողմից ընտրված խորհրդարանի կառավարումն է, արեւմուտքում՝ մայրաքաղաք Տրիպոլիում, կառավարում է ՄԱԿ եւ Եվրամիության աջակցությամբ ձեւավորված եւ Ֆայեզ Սարաջի գլխավորած ազգային համաձայնության կառավարությունը։ Երկրի արեւելյան հատվածի իշխանությունները գործում են Տրիպոլիից անկախ եւ համագործակցում են Խաֆթարի բանակի հետ, որն ապրիլից չի դադարեցնում Տրիպոլին գրավելու փորձերը: