Համակարգային կոռուպցիան ՔԿՀ-ից վերացվել է, կան «մանր-մունր» գողեր։ Այս մասին այսօր՝ դեկտեմբերի 20-ին, լրագրողների հետ հանդիպմանն ասաց Քրեակատարողական ծառայության պետ Արթուր Գոյունյանը։
Քրեակատարողական ծառայության պետը խոսեց նաեւ ՔԿՀ-ում արգելված իրերի թմրամիջոցների հայտնաբերումների վերաբերյալ.
«Այդ մասով ակտիվ աշխատանքներ են իրականացվում, վիճակագրությունն այդ մասով վառ վկայում է։ Մեր կայքերում օպերատիվ կերպով ներկայացվում են արգելված իրերի հայտնաբերման ձախողված փորձերի, արտանետումների փորձերի վերաբերյալ տեղեկատվությունը։ Հանրությունը ժամանակին իրազեկվում է, եւ դա կանխարգելիչ բնույթ է ունենում։ Ասեմ, եթե նախկինում արգելված հեռախոսը դատապարտյալին քրեակատարողական «ծառայողների» կողմից հասցնելը նույնպես ունեցել է որոշակի դրույքաչափեր եւ այդ կոռուպցիոն մեխանիզմները գործել են։ Այսօրվա դեպքը վկայում է այն մասին, որ գրեթե բացառվել են այդ հնարավորությունները, քանի որ արտանետումով են փորձում հեռախոսները տեղ հասցնել եւ այդ փորձերն էլ ձախողվում է»։
Արթուր Գոյունյանը պատմեց, որ դատապարտյալներին հանձնուկներ հասցնելու տարբեր մեխանիզմներ են կանխվել.
«Ունեցանք նաեւ զավեշտալի դեպքեր՝ արգելված իրերի ներթափանցման, նույնիսկ աղավնիներով, դրոններով էին փորձել թմրամիջոցներ հասցնել դատապարտյալներին, նույնիսկ գյումրվա քյալլայի մեջ թմրամիջոց էին թաքցրել եւ որպես հանձնուկ ներկայացրել էին։ Նմանատիպ դեպքերը նույնպես բացառվել են»։