2019 թվականին 365 սկսնակ գործարարներ անցել են վերապատրաստման դասընթացներ, որոնք զինում են նրանց գիտելիքներով, օգնում են մշակել բիզնես ծրագրեր. Նրանցից 238-ը մշակել են իրատեսական գործարար ծրագրեր: Այս մասին, այսօր՝ դեկտեմբերի 20-ին, լրագրողների հետ զրույցում նշեց ՀՀ Էկոնոմիկայի փոխնախարար Նաիրա Մարգարյանը:
Նրա խոսքով, դրանցից 159-ը ներկայացվել են ֆինանսական աջակցության. «Ֆինանսական աջակցությունը մնք տրամադրում ենք վարկային երաշխավորության ձեւով: Պարզ է, որ սկսնակ գործարարներին բանկերը դժվարությամբ են վարկեր տրամադրում, որովհետեւ չկա գրավ, չկա վստահություն, նախորդ տարիների հաշվետվություններ եւ գալիս է հեղինակավոր երաշխավորի կարիքը: Հենց դա էլ մենք անում ենք Ներդրումների աջակցման կենտրոնի շնորհիվ:
Վարկերը տրամադրվում էին 5 տարի մարման ժամկետով, 10 տոկոսով: Այս տարվա ընթացքում արդեն իսկ 72 սուբյեկտ ստացել է ՓՄՁ վարկերը, աշխատանքները դեռ շարունակվում են»,-ասաց փոխնախարարը:
Նա ընդգծեց, որ ՓՄՁ-ների զարգացման 2020-2024 թվականների ռազմավարության մեջ կարեւոր տեղ է հատկացվում նրանց մրցունակության բարձրացմանը. «Այս ուղղությամբ կա 4 հենասյուն մեր ռազմավարության մեջ. առաջինը ֆինանսական ռեսուրսների հասանելիությունն է: Հաջորդ հենասյունը ՓՄՁ սուբյետկտների կարողություն ու ձեռնարկատիրական մշակույթի զարգացումն է: Ունենք ՓՄՁ սուբյեկտների համար շուկաների հասանելիության հենասյուն: Եվ վերջին հենասյունը ՓՄՁ զարգացման համար բարենպաստ ինստիտուցիոնալ եւ իրավական միջավայրի ապահովումն է: Այստեղ ավելի շատ խոսելու ենք վարչարարության, օրենսդրության մասին»,-ասաց փոխնախարարը:
