«Արմավիր» ՔԿՀ թմրանյութ անցկացնելու ժամանակ բռնված անձը ամենևին էլ մանր ձուկ չէ, նորմալ ձուկ է։Այս մասին այսօր՝ դեկտեմբերի 20-ին, լրագրողների հետ հանդիպմանն ասաց ՀՀ ԱՆ քրեակատարողական ծառայության պետ, արդարադատության գեներալ-մայոր Արթուր Գոյունյանը՝ պատասխանելով հարցին, թե արդյոք թմրանյութ անցկացնելու ժամանակ բռնված ՔԿՀ աշխատողը «մանր ձուկ» չէ, արդյոք չի հովանավորվել ՔԿՀ պետի կողմից։
«Արմավիր» ՔԿՀ թմրանյութ անցկացնելու ժամանակ բռնված անձը 2 ամիս առաջ վերցվել է մշտադիտարկման տակ։ Նա ամենևին էլ մանր ձուկ չէ, նորմալ ձուկ է։ Ով է ասում մանր ձուկ է, թմրանյութի ավարի փաթեթներն այնքան շատ էին, որ ինձ չհասցրին ամբողջությամբ ներկայացնեն։ Եթե չլիներ «Արմավիր» ՔԿՀ ղեկավարի աչալրջությունը, պատշաճ ղեկավարումը, պահանջկոտությունը, խստությունը, իհարկե չէր բացահայտվի այս դեպքը։ Բացահայտվել է իրենց նախաձեռնությամբ։ ՔԿՀ պետը հետամուտ է եղել, որ մերկացնի իր աշխատողին։ Այս գործով ամբողջ շղթան է հայտնի մեզ, նախաքննությունից ելնելով չեմ ներկայացնում, բայց երբ հրապարակվի տվյալները, կտեսնենք, որ բռնված աշխատողը ձկնիկ չի, լավ էլ ձուկ է։ Մի ամբողջական փաթեթի մեջ փաթեթիկներ են եղել, 200 գ մարիխուանան լուրջ քանակություն է, 19 դեղահաբ «Լիրիկա», «Սուբուտեքսի» փշրանք, մեկ դեղահաբը 100 հազար դրամ արժի»,-ասաց նա։