Պատկերացնո՞ւմ եք Վերաքննիչ դատարանի դատավոր Լուսինե Աբգարյանի վիճակը, եթե ազատ արձակեր ՀՀ երկրորդ նախագահ Ռոբերտ Քոչարյանին։ Այս մասին այսօր՝ դեկտեմբերի 20-ին, լրագրողների հետ զրույցում ասաց Ռոբերտ Քոչարյանի որդին՝ Լեւոն Քոչարյանը։
«Այն մթնոլորտը, այն ինչը, որ կատարվում է մեր դատական իշխանության հետ։ Եվ այդ մթնոլորտում սպասել, որ դատավոր պետք է հերոսանա… Պատկերացրեք՝ Լուսինե Աբգարյանի վիճակը, եթե ազատ արձակեր հորս, պատկերացնո՞ւմ եք՝ ինչ կկատարվեր։ Երբ անցած անգամ հորս ազատ էին արձակել, հաջորդ օրը ՀՀ վարչապետը կոչ արեց փակել դատարանների մուտքերը։ Հասկանո՞ւմ եք՝ ինչ է կատարվում, աշխարհում չլսված բան է»։
Ավելի վաղ հայտնել էինք, որ Վերաքննիչ քրեական դատարանն այսօր՝ դեկտեմբերի 20–ին, մերժել է ՀՀ երկրորդ նախագահ Ռոբերտ Քոչարյանի նկատմամբ որպես խափանման միջոց գրավի կիրառումը անթույլատրելի ճանաչելու՝ առաջին ատյանի դատարանի որոշումը վիճարկող՝ պաշտպանների միջնորդությունը։ Ռոբերտ Քոչարյանը կմնա կալանքի տակ։