Առաջատար տեխնոլոգիաների ձեռնարկությունների միությունում դժգոհ են Հայաստանի՝ որպես «surprising engineering» առաջարկող երկրի իմիջը զարգացնելու գործընթացում ներգրավվածության մակարդակով: Այդ մասին ICT Leaders Meeting ֆորումի ժամանակ հայտարարել է VOLO ընկերության տնօրեն, Հայաստանում ԱՏՁՄ-ի հասարակայնության հետ կապերի համակարգող Արմեն Քոչարյանը:
«Քանի որ երկրի փիարը վերջնարդյունքում նպաստում է նաեւ երկրում ձեռնարկությունների զարգացմանը, ցանկալի կլիներ ավելի ակտիվորեն ներգրավվել այդ գործընթացում»,-հայտարարել է նա: Քոչարյանը նշել է այդ փաստը գիտակցելու անհրաժեշտությունը, որ համընդհանուր ջանքերով կարելի է շատ ավելի շոշափելի արդյունքներ արձանագրել: «Այսօր մենք աշխատում ենք փակ, յուրաքանչյուրը մտածում է «դա իմն է, դա իմ տարածքն է» եւ վերջ: Բնականաբար, դրա համար կան նաեւ օբյեկտիվ պատճառներ: Յուրաքանչյուրը զբաղված է իր օպերացիոն խնդիրներով եւ հնարավորություն չունի կնետրոնանալ ուրիշ հարցերի շուրջ»,-հայտարարել է նա: Քոչարյանն առաջարկել է դիտարկել որոշակի բյուջեների եւ աշխատանքային խմբերի ձեւավորումը Միության ներսում, որոնք կներգրավվեին ձեռնարկություններն ակտիվ նախագծերով: Դա թույլ կտար զարգացնել գործընթացը, որպեսզի դրա իրականացումը չկենտրոնանար միայն 1-2 ծրագրերի շուրջ, այլ ապահովեր ավելի մեծ ներգրավվածություն: «Այժմ ամբողջ գործընթացը կենտրոնացած է մեկ տեղում, սակայն խնդիրն ավելի մեծ է եւ չի կարող լուծվել մեկ մարդու կողմից»,-հայտարարել է նա:
Դրա հետ մեկտեղ, հաջողվել է գրանցել որոշակի արդյունքներ: SMM-ի գծով զգալի չափով աշխատանք է տարվել այնպիսի հարթակների կիրառմամբ, ինչպիսիք են LinkedIn-ը, Facebook-ը, Twitter-ը: Ձեւավորվել է շահառուների փակ խումբ, որը քննարկել է նախագծերը, շնորհանդեսներն ու միջոցառումները: Կապեր են հաստատվել Հայաստանում կրեդիտավորված դեսպանատների հետ երկրի իմիջը բարձրացնելու համար:
Խնդիրը կայանում էր միայն նրանում, որ բոլոր գործընթացներն իրականացվել են VOLO-ի ռեսուրսների միջոցով. մյուս ընկերությունները չեն արձագանքել: Քննարկման մասնակիցները համակարծիք էին, որ խոսքը վերաբերում է դասական իրավիճակին, երբ առաջադրված նպատակներին հասնելու համար պարզապես ռեսուրսները բավարար չեն: Հնչել են նաեւ կարծիքներ, որ պլանավորման ժամանակ անհրաժեշտ է առավել իրատեսական նպատակներ առաջադրել, որոնք հնարավոր կլինի իրագործել առկա ռեսուրսների միջոցով: