Աթենքի Ակրոպոլիսում տեղադրվելու է նոր գիշերային լուսավորություն, հայտնել է Հունաստանի մշակույթի նախարար Լինա Մենդոնին տոների նախաշեմին լրագրողների հետ ոչ պաշտոնական հանդիպմանը: Նա չի հստակեցրել, թե աշխատանքները երբ կավարտվեն, հայտնում է «ՌԻԱ Նովոստի»-ն:
Հունաստանում Աթենքի Ակրոպոլիսը ամենաշատ այցելուներ ունեցող հնագիտական օբյեկտն է, այս տարվա հունվարից օգոստոս Ակրոպոլիս է այցելել գրեթե 2,5 մլն մարդ:
Ներկայիս լուսավորությունը տեղադրվել է 2004 թվականին Աթենքում Օլիմպիական խաղերի հետ կապված: Հին լամպերը փոխարինվելու են նոր՝ LED տեխնոլոգիայով պատրաստվածներով:
Աշխատանքը ֆինանսավորում է Օնասիսի բարեգործական հիմնադրամը, որը 1,5 մլն եվրո է հատկացրել Ակրոպոլիսի լուսավորության փոխարինման եւ հաշմանդամների ու Սուրբ լանջ բարձրանալ դժվարացող մարդկանց համար վերելակի վերանորոգման համար: Վերելակը ժամանակավոր տեղադրվել էր 2004 թվականի Օլիմպիադային ընդառաջ, 15 տարում մեխանիզմը հնացել է, մշտապես խափանվել: Վերելակն ամառվանից չի գործում: Նոր վերելակը համապատասխանելու է սահմանափակ հնարավորություններով մարդկանց համար եվրոպական ստանդարտներին:
Տեխնիկական դժվարությունների պատճառով մի փոքր ուշացում կլինի, վերելակն ապրիլին պատրաստ չի լինի, բայց, անկասկած, կգործի զբոսաշրջության թեժ սեզոնին, ասել է նախարարը:
Շարունակվելու են Ակրոպոլիսի հին թանգարանի արդիականացման աշխատանքները: Նախագիծը ընդգրկել է 1 մլն եվրո բյուջե, չնայած իրականում անցնում է 2 մլն եվրոյից: Պարթենոնում տեղակայված թանգարանի շենքը կառուցվել է 1874 թվականին, 1964 թվականին մի շարք փոփոխություններ են կատարվել: Հին թանգարանը չի գործում 2009 թվականից, երբ բացվել է Ակրոպոլիսի նոր թանգարանը: Արդիականացումից հետո հին թանգարանը չի մրցակցի Ակրոպոլիսի նոր թանգարանի հետ, դրա ցուցադրանմուշները նվիրված են լինելու լանջի վրայի կառույցների շինարարության պատմությանը, այլ ոչ թե արվեստի ստեղծագործություններին:
Մենդոնին նաեւ հայտնել է, որ Ակրոպոլիսում կարգավորում են էլեկտրասարքավորումները: Ակրոպոլիսում կա 175 տարատեսակ էլեկտրավահան, եւ ոչ մեկը ստույգ չգիտեր՝ դրանք որտեղ էին գտնվում, հիմա կազմված է դրանց տեղադրության քարտեզ:
Մշակույթի նախարարությունը ծրագրում է ապրիլին ողբերգական միջադեպից հետո ավարտել նաեւ կայծակներից Ակրոպոլիսի պաշտպանության աշխատանքները:
Այս տարվա ապրիլի 17-ին Աթենքի Ակրոպոլիսում ուժեղ ամպրոպի ժամանակ հարվածել էր կայծակը: Այն վնասել էր կայծակը հետ մղող սարքը եւ հարվածել Էրեխտիոնի մոտ գտնվող պահակետին: Վիրավորվել էին 2 հսկիչ եւ 2 զբոսաշրջիկ: