Պայթուցիկներով լցված բեռնատարը շաբաթ առավոտյան մահապարտ-ահաբեկչի կողմից պայթեցվել է Սոմալիի մայրաքաղաք Մոգադիշոյում։ Այս մասին հայտնել է երկրի տեղեկատվական «Գարովե օնլայն» կայքը՝ հղում կատարելով մայրաքաղաքի ոստիկանությանը, հայտնում է ՏԱՍՍ-ը։
«Մահապարտը բեռնատարն ուղղել է ոստիկանական անցագրային կետի վրա»,- հայտնել է ոստիկանության սպա Ահմեդ Բաշիրը։
Հանրապետության դաշնային խորհրդարանի անդամ Աբդուրազակ Մուհամմեդը Twitter-ի իր էջում ավելի վաղ հայտնել էր, որ զոհվածների թիվը կազմում է ավելի քան 90 մարդ, որոնց թվում 17 ոստիկաններ եւ 73 քաղաքացիական անձինք են։ Dalsan ռադիոկայանը հաստատել է այդ թվերը՝ նշելով, որ զոհերի մեջ Թուրքիայի չորս քաղաքացի կա։
Բեռնատարի պայթեցումը տեղի է ունեցել հարավարեւմտյան անցակետում, որը Մոգադիշոյում ամենախոշորներից է։ Ահաբեկիչը բեռնատարն ուղղել է դեպի գրասենյակ, որտեղ կատարվում են ճանապարհային վճարները եւ փաստաթղթերի ձեւակերպումը։ Օրվա այդ ժամին այնտեղ մեծ թվով մարդիկ են հավաքվում։ Ինչպես նշել է Մոգադիշոյի քաղաքապետ Օմար Ֆիլիշը, ահաբեկչության զոհերի թվում Բենադիրի համալսարանի շատ ուսանողներ կան։ Նրանք եղել են ավտոբուսում, որը գտնվել է պայթյունի էպիկենտրոնում։ Անցակետի մոտ նաեւ տեղակայված է եղել թուրք ինժեներների խումբ, որը շինարարական աշխատանքներ էր իրականացնում Մոգադիշոյում։
Սոմալիի վարչապետ Հասան Ալի Հայրեն հայտարարել է, որ հետաձգում է նախընտրական քարոզչության շրջանակներում իր այցերը։
Դեռեւս ոչ մի ահաբեկչական կազմակերպություն պայթյունի պատասխանատվությունն իր վրա չի վերցրել, սակայն բրիտանական հետախուզությունը հայտնել է, որ դրան մասնակից է «Ալ Շաբաբը»։
