Թեհրանը դիմել է ՄԱԿ Անվտանգության խորհուրդ Իրաքում ԱՄՆ գործողության ընթացքում Իսլամական հեղափոխության պահապանների կորպուսի գեներալ Ղասեմ Սոլեյմանիի սպանության շուրջ իրավիճակի հետ կապված, ասել է Իրանի ԱԳՆ պաշտոնական ներկայացուցիչ Աբաս Մուսավին, տեղեկացնում է ՌԻԱ «Նովոստի»-ն։
«Արտաքին գործերի նախարարությունն արդեն ձեռնարկում է քաղաքական, իրավաբանական եւ միջազգային միջոցներ, այդ թվում ՄԱԿ Անվտանգության խորհրդի մակարդակով»,- ասել է նա։
Հունվարի 3-ի գիշերը ԱՄՆ-ը Բաղդադի միջազգային օդանավակայանի շրջանում իրականացրել է գործողություն Սոլեյմանիի եւ իրաքյան շիական աշխարհազորի ղեկավարի տեղակալ Աբու Մահդ ալ Մուհանդիսի դեմ, որոնց Վաշինգտոնում համարում են 2019 թվականի դեկտեմբերի 31-ին Բաղդադում ամերիկյան դեսպանության վրա հարձակման կազմակերպման հանցակիցներ։
Իրանի գերագույն առաջնորդ Ալի Խամենեին խոստացել է վրեժ լուծել ԱՄՆ-ից Սոլեյմանիի մահվան համար։ ԱՄՆ նախագահ Դոնալդ Թրամփը խոստացել է «արագ եւ ուժեղ հարված» հասցնել իրանական 52 թիրախների, եթե գրոհի ենթարկվեն ամերիկացիները։
Համաշխարհային հանրությունը զսպվածության կոչ է արել ԱՄՆ-ին եւ Իրանին։
