Ճապոնիայում դատվող Renault-Nissan-Mitsubishi ավտոկոնցեռնի վարչության նախկին ղեկավար Կառլոս Գոնին օգնել են Լիբանան փախչել երկու ամերիկացիներ, հայտնում է ճապոնական NHK հեռուստաալիքը:
Գոնը Ճապոնիայից փախել է՝ օգտվելով այն հանգամանքից, որ տնային կալանքի մեջ էր: NHK-ն հայտնում է, որ դեկտեմբերի 29-ին նախկին թոփ մենեջերը միայնակ հեռացել է Տոկիոյի իր բնակարանից եւ 800 մետր անցել մինչեւ հյուրանոց, որտեղ հանդիպել է երկու ամերիկացիների: Այս մարդիկ նույն օրը առավոտյան Դուբայից Օսակա էին ժամանել մասնավոր օդանավով: Նրանք իջեւանել էին օդանավակայանի շրջակայքի հյուրանոցներից մեկում: Նրանց մոտ կար մեծ արկղ:
Ամերիկացիներն ավելի ուշ ճեպընթացով Օսակայից Տոկիո էին մեկնել: Նրանք նույն ճանապարհով Տոկիոյից Օսակա էին վերադարձել, բայց արդեն Գոնի հետ: Երկու ժամ անց ամերիկացիները հյուրանոցը լքել էին 2 մեծ արկղերով: Կառլոս Գոնը նրանց հետ չի եղել: Արկղերը հայտարարագրվել էին որպես երաժշտական գործիքներ, իսկ Օսակայի օդանավակայանում դրանք չէին ստուգվել ո՛չ անվտանգության սքաներով, ո՛չ մաքսատանը: Տեղական ժամանակով 23.10-ին երկու ամերիկացիներով մասնավոր օդանավը Օսակայից ուղեւորվել էր Թուրքիա:
Ճապոնիայի իշխանությունները ենթադրում են, որ Կառլոս Գոնը եղել է 2 արկղերից մեկում, որոնք ամերիկացիներն առանց ստուգելու տարել են իրենց օդանավ: Ճապոնիայի արդարադատության նախարար Մասակո Մորին հունվարի 6-ին հայտարարել էր, որ Գոնը երկրից հեռացել է՝ օգտվելով «անօրինական մեթոդներից»: Ինքը՝ Կառլոս Գոնը դեռեւս չի ասել, թե իրեն ինչպես է հաջողվել Ճապոնիայից Թուրքիայով Լիբանան փախչել:
Մինչդեռ Nissan ավտոկոնցեռնը մտադիր է հետագայում եւս շարունակել Գոնի դեմ դատավարությունը, չնայած նրա փախուստին: «Renault-Nissan-Mitsubishi-ն ղեկավարելիս Կառլոս Գոնը լուրջ խախտումներ է թույլ տվել: Ընկերությունը հետագայում էլ կձեռնարկի իրավաբանական քայլեր, որպեսզի Գոնին պատասխանատվության ենթարկի իր գործողություններով Nissan-ին պատճառած վնասի համար»,- նշված է հունվարի 7-ին հրապարակված Nissan-ի հայտարարության մեջ: