Թերթը զրուցել է Հայաստանում Վրաստանի նորանշանակ դեսպան Թենգիզ Շարչմանաշվիլիի հետ: Ներկայացնում ենք զրույցից մի հատված:
Հայկական կողմը բազմիցս առաջարկել է Վրաստանում հայկական եկեղեցուն կագավիճակ տրամադրել, բայց այդ հարցում դեռ առաջընթաց չկա:
Ուրախ եմ, որ ամառվա սկզբին Ամենայն հայոց կաթողիկոսը կայցելի Վրաստան, եւ, ամենայն հավանականությամբ, վերոնշյալ հարցի մասին երկու կաթողիկոսները կզրուցեն: Իհարկե իրենք օրենսդիր մարմին չեն, բայց ունեն մեծ ազդեցություն այդ հարցի լուծման համար: Հարցը միայն հայկական եկեղեցուն չի վեևաբերում. այն քննարկվում է նաեւ Հռոմի կաթոլիկ եւ այլ եկեղեցիների հետ, քանի որ ներկայումս Վրաստանում քննարկվում է կրոնական կազմակերպություններին կարգավիճակ շնորհելու հարցը: Չէի ցանկանա, որ տպավորություն ստեղծվեր, որ այլ կրոնական կոնֆեսիաների հարցը փակված է, իսկ հայկական եկեղեցին միտումնավոր է այդպիսի վիճակում: Վրաստանում հայկական եկեղեցու դեմ հատուկ վերաբերմունք չկա:
Տեղական մամուլում շատ է գրվում, որ հայաստանյան գործարարները Վրաստան են տեղափոխում իրենց կապիտալը: Դուք այդպիսի միտումներ տեսնո՞ւմ եք:
Այդ տեղեկությունները չափազանցված են: Գիտեմ, որ նրանք Վրաստանում ներդրումներ են իրականացնում, ինչի համար ուրախ եմ: Վրաստանում բոլորն էլ գոհ են, որ գրավիչ ներդրումային իրվիճակ է ստեղծվել: Իհարկե, մեր շահերից չի բխում, որ ինչ-որ բիզնեսներ փակվեն Հայաստանում, եւ նրանք տեղափոխվեն Վրաստան, քանի որ հետագայում դա ոչ մի լավ բանի չի բերի: Մենք ուղղակի ողջունում ենք հայկական ներդրումները վրացական տնտեսությունում:
