Եվրոպայի խորհրդի Նախարարների կոմիտեն հունվարի 7-ին հանդես է եկել հաղորդագրությամբ ի պատասխան ՌԵԱԼ կուսակցության առաջնորդ Իլգար Մամեդովի բողոքի, որը Ադրբեջանի իշխանություններին մեղադրել է ազատ ընտրությունների իր իրավունքի խախտման մեջ: Այս մասին հայտնում է Turan-ը:
Հաղորդագրության մեջ նշված է ԵԽ Նախարարների կոմիտեին Բաքվի իրազեկման մասին, որ Գերագույն դատարանի պլենումի օրը, որի ժամանակ քննվելու է Մամեդովի գործով ՄԻԵԴ որոշումների կատարման մասին հարցը, դեռեւս չի որոշվել: Պաշտոնական Բաքուն ԵԽ Նախարարների կոմիտեին խոստացել է, որ այդ գործով որոշումը կհրապարակվի «հնարավորինս շուտ»: Մամեդովը մինչ այդ պահը պետք է հետեւի քրեադատավարական օրենսգրքի դրույթներին: ԵԽԽՎ Մոնիթորինգային կոմիտեի Ադրբեջանի հարցով զեկուցողներ Սթեֆան Շենակը եւ Ռոջեր Գեյլը նույնպես ափսոսանք են հայտնել, որ Ադրբեջանի իշխանությունները ամբողջությամբ չեն կատարել Մամեդովի եւ եւս 7 ակտիվիստների վերաբերյալ ՄԻԵԴ որոշումները:
Զեկուցողներն իրենց հայտարարության մեջ հիշեցնում են, որ Բաքուն պարտավոր էր ՄԻԵԴ որոշումները կատարել մինչեւ 2019 թվականի դեկտեմբերի 31-ը: «Եթե մինչեւ հունվարի 10-ը անհրաժեշտ միջոցառումներ չձեռնարկվեն, ապա Մամեդովը եւ նրա գործընկերները չեն կարողանա մասնակցել փետրվարի 9-ին խորհրդարանական ընտրություններին: Դա կսասանի ընտրությունների եւ դրանց ժողովրդարական հիմքերի հանդեպ վստահությունը»,- կարծում են զեկուցողները:
Նրանք նաեւ հիշեցրել են, որ խոսքի եւ հավաքների ազատությունն անհրաժեշտ պայմաններ են ազատ եւ արդարացի ընտրությունների համար:
2019 թվականի սեպտեմբերի 26-ին Եվրոպայի խորհրդի Նախարարների կոմիտեն Ադրբեջանի իշխանություններին կոչ էր արել չեղարկել 8 ակտիվիստների, որոնք հայտնի են «Իլգար Մամեդովի խումբ» ընդհանուր անվանմամբ, մեղադրական դատավճիռները եւ հանել դատվածությունը, որոնց իրավունքների խախտումը ճանաչել էր Ստրասբուրգի դատարանը: Այդ ակտիվիստների թվում են՝ Իլգար Մամեդովը, Ռասուլ Ջաֆարովը, Զաուր Գուրբանլին, Անար Մամեդլին, Ինթիգամ Ալիեւը, Ուզեիր Մամեդլին, Ռաշադատ Ախունդովը եւ Ռաշադ Հասանովը: Ադրբեջանի կառավարությունը պետք է մինչեւ դեկտեմբերի 31-ն ամբողջությամբ վերականգներ նրանց իրավունքները, այսինքն՝ հաներ դատվածությունը: Սակայն դա չի արվել, եւ նշված անձինք դատվածության պատճառով չեն կարող խորհրդարանի պատգամավորի թեկնածու առաջադրվել:
