Ազգային ժողովի նախկին պատգամավոր ՄԱՊ-ի Ալիկ անունով հայտնի Ալիկ Պետրոսյանը քիչ առաջ դուրս եկավ ԱԱԾ մեկուսարանից։ Նա NEWS.am-ին ասաց, որ ունի նորմալ տրամադրություն։ Իրեն առաջադրված մեղադրանքի մասին չցանկացավ խոսել։
Նշենք, որ Ալիկ Պետրոսյանն այսօր՝ հունվարի 10-ին, 30 մլն դրամ գրավի դիմաց է ազատ արձակվել։ Պաշտպանը նաեւ ֆեյսբուքյան իր էջում գրառում էր արել այդ մասով, նշելով, որ պաշտպանության կողմը համաձայն չէ նաեւ այս որոշման հետ.
«Ճիշտ է՝ պաշտպանության կողմը համաձայն չէ նաեւ այս որոշման հետ, քանի որ խափանման միջոցն առհասարակ պետք է վերացվեր, բայց այնուամենայնիվ պետք է փաստենք, որ դատարանը որոշակիորեն օբյեկտիվ գտնվեց անձին արգելանքի տակ պահելու հարցը լուծելիս։
Թող մյուս դատավորներն էլ իրենց մեջ հաղթահարեն նախաքննական մարմինների /ՀՔԾ/ ու դատախազության հանդեպ ունեցած վախը, հանձինս նրանց, ովքեր սրանից երկու օր առաջ, նույն պայմաններում նույն մեղադրյալին թողել էին կալանքի տակ, եւ այսուհետ կայացնեն օբյեկտիվ որոշումներ»։
Ավելի վաղ NEWS.am-ը հայտնել էր, որ Պետրոսյանը կալանավորվել է բնապահպանության նախկին նախարար Արամ Հարությունյանի դեմ հարուցված քրեական գործի շրջանակներում։ Ձերբակալված է եղել նաեւ նրա որդին՝ Մակար Պետրոսյանը, սակայն որոշ ժամանակ անց ազատ արձակվել:
Նշենք, որ Պետրոսյանը մեղադրվում է փողերի լվացմանն օժանդակելու մեջ:
Հատուկ քննչական ծառայությունը Ալեքսան Պետրոսյանի եւ նրա որդու գործի վերաբերյալ որեւէ մեկնաբանություն չի տալիս:
