Հատուկ Քննչական ծառայությունում ավարտել է երրորդ նախագահ Սերժ Սարգսյանի գործով նախաքննությունը, NEWS.am-ին հայտնել է Սերժ Սարգսյանի պաշտպան Ամրամ Մակինյանը: Մեղադրանք է առաջադրվել 5 անձի, այդ թվում Սերժ Սարգսյանին եւ «Ֆլեշ» ընկերության սեփականատեր Բարսեղ Բեգլարյանին։ Վարույթն իրականացնող մարմինը քրեական գործով ձեռք բերված ապացույցները բավարար է համարել` մեղադրական եզրակացություն կազմելու եւ գործը դատարան ուղարկելու համար։

«Դալմա Գարդեն մոլը» փակ է: ԱԻՆ-ից տեղեկացրել են, որ չափիչ սարքերը դեռ տեղադրված են, որ եթե ցնցումները կրկնվեն, գրանցեն պատճառը: Երկրաշարժ չի եղել, ցնցումների պատճառը մարդկային գործոնն է, բայց հստակ չէ՝ ինչ տեսակի: Ավելի վաղ հայտնել էինք, որ երեկ երեկոյան խուճապ էր տարածվել Երեւանի «Դալմա Գարդեն Մոլ» առեւտրի կենտրոնում։ Այցելուները համացանցում լուր են տեսել, թե երկրաշարժ է լինելու եւ  խուճապի մատնված զանգվածաբար լքել են շենքը։ Այդուհանդերձ, նշվել է, որ մոտ 30 րոպե շենքը ցնցվել է, ինչի պատճառները դեռ պարզ չեն:

Ազգային ժողովի նախկին պատգամավոր ՄԱՊ-ի  Ալիկ անունով հայտնի Ալիկ Պետրոսյանը այսօր դուրս է եկել ԱԱԾ մեկուսարանից։ Նա ասել է, թե տրամադրությունը նորմալ է, իսկ իրեն առաջադրված մեղադրանքի մասին չի ցանկացել խոսել։ Պետրոսյանն ազատ է արձակվել 30 մլն դրամ գրավի դիմաց։ Նա կալանավորվել էր բնապահպանության նախկին նախարար Արամ Հարությունյանի դեմ հարուցված քրեական գործի շրջանակում։ Ալիկ Պետրոսյանը մեղադրվում է փողերի լվացմանն օժանդակելու մեջ:

ԱԱԾ նախկին տնօրեն Արթուր Վանեցյանը քաղաքական հայտ է ներկայացրել իր հրաժարականի պահից սկսած, ասել է քաղտեխնոլոգ Վիգեն Հակոբյանը։ Ըստ նրա, Վանեցյանի ստեղծած քաղհասարակության աջակցության հիմնադրամը եւս քաղաքականության մեջ իր տեղն ամրապնդելու քայլ է։

Վարչապետի որոշ հայտարարություններում կոնկրետություն կա, ասել է քաղաքագետ Արմեն Բադալյանը, նկատի ունենալով Նիկոլ Փաշինյանի այն խոսքերը, թե ամբողջ պետական համակարգը դիմադրում է հեղափոխությանը։ Օրինակ՝ արտգործնախարարությունն ինչպե՞ս է դիմադրում, հանձնարարություն եք տալիս՝ չե՞ն կատարում, գյուղնախարարությունն ինչպե՞ս է դիմադրում, հարցրել է քաղաքագետը։ Ըստ նրա, միաժամանակ ժարունակվում է հասարակությանը «սեւերի» եւ «սպիտակների» բաժանելը:

Հերթական պաշտոնանկությունը պետական համակարգվում։ Վարչապետ Փաշինյանի որոշմամբ՝ Վարդան Մելքոնյանն ազատվել է Ջրային կոմիտեի նախագահի պաշտոնից:

Տարածվող լուրերի վերաբերյալ, թե ուկրաինական օդանավը աղետի է ենթարկվել իրանական հրթիռի հարվածից, իրանագետ Վարդան Ոսկանյանն ասել է, որ այսօր ընթանում է քարոզչական պատերազմի բավական ինտենսիվ փուլ եւ պետք է հետեւություն անել բացառապես փաստական տվյալներից, այլ ոչ թե քաղաքական գործիչների հայտարարություններից: Ակնհայտորեն նկատի ունենալով հայաստանցի մասնագետների վերաբերյալ վարչապետի կոչը, նրա ձեւակերպմամբ, տնաբույծ գեոպոլիտիկներին հանգիստ տեղները նստելու մասին, իրանագետն արձագանքել է. «Եթե ես լինեի որոշում կայացնողը, շատ որոշումներ այլ կերպ կկայացնեի»:

Առաջիկա 1-2 տարվա ընթացքում Մերձավոր Արեւելքում հանգիստ չի լինի, լրագրողներին ասել է Արեւալագիտության ինստիտուտի տնօրեն Ռուբեն Սաֆրաստյանը։ Նրա խոսքեվ՝ Իրանի եւ ԱՄՆ-ի միջեւ հակամարտության առաջին՝ մարտավարական փուլն ավարտված է, հիմա հակամարտությունը կտեղափոխվի ռազմավարական հարթություն, որն ավելի կարեւոր խնդիրների է վերաբերելու։ 

Ճիշտ չէ այդպիսի ողբերգական դեպքերին հանրային մեծ հնչեղություն տալը, հունվարի 5-ին Երեւանում 16-ամյա աղջկա սպանության ու դրա շուրջ հասարակական արձագանքներին անդրադառնալով, ասել է հայտնի հոգեբան Կարինե Նալչաջյանը։ Կիսատ-պռատ ինֆորմացիայով դատողություններն ու հեռուն գնացող եզրակացություններն անթույլատրելի են, նշել է նա։

Աբխազիայի մայրաքաղաք Սուխումում շարունակվող ցույցերին հայ համայնքը ներգրավված չէ, NEWS.am-ին ասել է Աբխազիայի հայերի միության ղեկավար Խաչիկ Մինասյանը։ Ըստ նրա՝ մայրաքաղաքում տիրող լարվածությունը հայ համայնքի վրա որեւէ վտանգավոր ազդեցություն չի կարող ունենալ.

Հիշեցնենք, որ Սուխումում ցուցարարները երեկվանից պահանջում են նախագահի հրաժարականը: Նրանք գրոհել են նախագահի նստավայրը, կոտրել դռներն ու պատուհանները: Խորհրդարանը եւս միացել է ցուցարարների պահանջին, իսկ նախագահ Ռաուլ Խաջիմբան չի նահանջում։ Ցուցարարներն արգելափակված են պահում խորհրդարանի, նախագահի վարչակազմի եւ նախարարությունների մուտքերը:

ԱՄՆ դոլարի փոխարժեքը նախորդ օրվա համեմատ նվազել է 0.36 դրամով եւ կազմել 479.26 դրամ: Եվրոյի փոխարժեքը նվազել է 0.54 դրամով ու կազմել  531.79 դրամ, բրիտանական ֆունտի փոխարժեքն աճել է 1.45 դրամով ու հասել 626.30 դրամի, ռուսական ռուբլու փոխարժեքն աննշան է նվազել ու կազմել է 7.81 դրամ։

Շաբաթ գիշեր Հայաստանի առանձին վայրերում սպասվում է թույլ ձյուն։ Հունվարի 11-ին, օրվա երկրորդ կեսին եւ կիրակի ամենուր կլինի առանց տեղումների եղանակ։ Օդի ջերմաստիճանն էապես չի փոխվի։ Երեւանում շաբաթ եւ կիրակի սպասվում է առանց տեղումների եղանակ։ Առաջիկա գիշեր մայրաքաղաքում կլինի -2-4, վաղը ցերեկը՝ +4+6։