Կուլտային մոտոցիկլետների ամերիկյան արտադրող Harley-Davidson-ը հայտարարել է GMC Sierra ծանր պիկապների լիմիտավորված շարքի թողարկման մասին։ Փոքր բեռնատարները առանձնանում են հատուկ արտաքին հարդարանքով, թափքի հարդարանքով եւ օպցիաների ընդլայնված ցուցակով, գրում է Motor-ը։
Նախկինում Harley-Davidson ընկերությունը պիկապների լիմիտավորված տարբերակները թողարկում էր միայն Ford-ի հետ համագործակցությամբ։ General Motors-ի ներկայացուցիչը ամերիկյան ԶԼՄ-ներին հայտարարել է, որ պիկապների հատուկ թողարկումը կկատարվի առանց ընկերության մասնակցության, իսկ Sierra-ի հատուկ շարքը Tuscany Motor Co-ի հետ Harley-Davidson-ի ոչ պաշտոնական համագործակցության արդյունք է։
Ուշադիր հայացքը կնկատի ռադիատորի ցանցի նարնջագույն շրջանակը, կոնտրաստային «ականջները» առջեւից եւ Harley-Davidson լոգոն թափքի վրա։ Ստանդարտ պիկապի հետ համեմատած՝ «մոտոցիկլետային» տարբերակում 65 լրացում է կատարվել։
Sierra Harley-Davidson-ի մեկնարկային գինը 95 000 դոլար է, դա մոտ 20 000 դոլարով ավել է, քան առավելագույն օպցիաներով սովորական Sierra պիկապը։ Չնայած թանկացմանը՝ 250 թողարկված մեքենաների մեծ մասը արդեն պատվիրված է։ Առաջին ավտոմեքենաները հաճախորդներին արդեն մեկ ամսից կհասնեն։