Պիտեր Յեթսի «Դետեկտիվ Բուլլիթ» ամերիկյան կուլտային ֆիլմում նկահանված Ford Mustang GT-ն Mecum աճուրդում նոր տիրոջը գտել է աննախադեպ՝ 3,74 մլն դոլարով, հայտնում է «Մոտորը»:
Սպորտքարը հանրահայտ 10-րոպեանոց հետապնդման հերոսն է, որը լավագույն մոնտաժի համար «Օսկար» կինոմրցանակի է արժանացել:
«Բուլլիթ» ֆիլմից ավտոմեքենան դարձել է մոդելի աշխարհում ամենաթանկարժեք ներկայացուցիչը: Մինչեւ հիմա ամենաթանկարժեք «Մուսթանգը» 1967 թվականի Shelby GT500-ն էր, որն անցյալ տարի Mecum աճուրդում ստացել էր 2,2 մլն դոլար:
Դետեկտեիվ Ֆրենք Բուլլիթը նույնանուն ֆիլմում Mustang GT-ի ղեկին հետապնդել է Dodge Charger-ով հանցագործներին: Այս կադրերը դարձել են սուր սյուժետային ժանրի դասական եւ համարվում են կինոինդուստրիայում ավտոհետապնդման լավագույն օրինակներից մեկը:
Հայտնի է, որ գլխավոր դերակատար Սթիվ Մաքկուինը փորձել է Mustang GT-ն նոր տիրոջից հետ գնել նկարահանումներից հետո 9 տարի անց, բայց մերժում է ստացել:
Կեսդարյա վաղեմության ֆիլմի հանդեպ ամերիկյան հանրության հետաքրքրությունը չի մարում. անցյալ տարի Discovery հեռուստաալիքում «Բուլլիթ» ֆիլմից հետապնդման ռեմեյք էին արել: Հատուկ տեսահոլովակի համար հրավիրել էին Սթիվ Մաքկուինի որդուն եւ պատրաստել 1968 թվականի «Մուսթանգի» պատճենը:
