Միացյալ Նահանգները պետք է զգուշացներ Կանադային Բաղդադի օդանավակայանում հունվարի 3-ի գիշերվա հարվածից առաջ, ինչի հետեւանքով զոհվեց Իսլամական հեղափոխության պահապանների կորպուսի (Իրանի ԶՈւ էլիտար զորամասեր) «Ալ Կուդս» հատուկ նշանակության ուժերի հրամանատար Ղասեմ Սոլեյմանին։ Այս մասին երկուշաբթի ասել է Կանադայի վարչապետ Ջասթին Թրյուդոն Global News հեռուստաալիքի հարցազրույցում, տեղեկացնում է ՏԱՍՍ-ը։
«Մենք համապատասխան զգուշացում (ԱՄՆ-ից) չենք ստացել»,- ասել է նա։ Պատասխանելվ հարցին, թե արդյոք Թրյուդոն չի կարծում, որ ԱՄՆ-ը պետք է զգուշացներ Կանադային այդ գործողության մասին, վարչապետն ասել է. «Իհարկե»։
Անհրաժեշտ է ձեռնարկել բոլոր միջոցները Մերձավոր Արեւելքում լարվածությունը անհապաղ թուլացնելու մասին՝ խուսափելու համար նոր զոհերից, եւ որպեսզի չկրկնվի Թեհրանի օդում ուկրաինական ինքնաթիռի ողբերգությունը, ավելացրել է նա։
«Ես կարծում եմ, որ եթե չլիներ այդ լարվածությունը, որը հաստատվել է (մերձավորարեւելյան) տարածաշրջանում վերջին ժամանակներս, ապա (ավիավթարից զոհված) այդ կանադացիներն այժմ կլինեին տանն իրենց ընտանիքների հետ»,- ասել է նա։ Թրյուդոյի խոսքով՝ հակամարտությունների կամ ռազմական գործողությունների ժամանակ միշտ տուժում են խաղաղ եւ անմեղ քաղաքացիները։ «Դա հուշում է մեզ բոլորիս, որ մենք պետք է ուժեղացված կերպով աշխատենք իրավիճակի լիցքաթափման եւ լարվածության թուլացման, ինչպես նաեւ լուծումներ գտնելու ուղղությամբ, որպեսզի խուսափենք ապագա կոնֆլիկտներից եւ մարդկային զոհերից»,- ընդգծել է վարչապետը։
Իրանի իշխանությունները պետք է ինչ-որ կերպ փոխհատուցեն «Ուկրաիանայի միջազգային ավիաուղիների» ինքնաթիռի զոհերի մերձավորների կրած կորուստը, ավելացրել է Թրյուդոն։ «Բոլոր երկրների (ներկայացուցիչները), որոնք կորցրել են իրենց քաղաքացիներին այդ աղետի պատճառով, հինգշաբթի կհանդիպեն Լոնդոնում Կանադայի տանը»,- ասել է նա։ Նրա խոսքով՝ հանդիպման ընթացքում կքննարկվեն հետեւյալ քայլերը, որոնք պետք է ձեռնարկեն այդ երկրները Թեհրանի երկնքում տեղի ունեցած ողբերգության հետ կապված։ «Ես կարծում եմ, որ (Իրանը) պետք է լիովին ընդունի (կատարվածի) պատասխանատվությունը եւ փոխհատուցման ինչ-որ ձեւ մտածի»,- ավելացրել է Թրյուդոն։
Նրա խոսքով՝ իրանական իշխանությունները պետք է լսեն ցուցարարների կարծիքը, որոնք դուրս են եկել բողոքի Թեհրանում՝ կապված իսլամական հանրապետության կողմից ավիավթարից մարդկանց զոհվելու պատասխանատվությունն ընդունելու հետ։ «Դա արդարության պահանջն է, եւ միանգամայն սպասելի էր,- ասել է նա։- Իրանի կառավարությունը պետք է ուշադիր լսի (ցուցարարների կարծիքը)»։ Նրա խոսքով՝ ավիավթարից զոհվել են Իրանի շատ քաղաքացիներ, ու զոհվածների հարազատները իրավունք ունեն պատասխան ստանալ իրենց հետաքրքրող բոլոր հարցերին։
Tasnim գործակալության տվյալներով՝ հունվարի 11-ին ուսանողների մի խումբ հավաքվել էր Ամիր Կաբիրի անվան Տեխնոլոգիական համալսարանում՝ իր բողոքն արտահայտելու Իրանի ԶՈւ-ի կողմից ուկրաինական Boeing 737 ինքնաթիռի կործանման պատասխանատվությունն ընդունելու հետ կապված։ Թեհրանում ցույցի էր դուրս եկել 3 հազար մարդ, ներկայում իրավիճակն Իրանի մայրաքաղաքում, ինչպես տեղեկացրել է ոստիկանության պետը, հանգիստ է։