Իրանի իշխանությունները կստեղծեն հատուկ կառույց դատական մարմինների համակարգում՝ Թեհրանի մոտ ուկրաինական ինքնաթիռի կործանման պատճառները եւ հանգամանքները հետաքննելու համար։ Այս մասին երեքշաբթի ասել է Իրանի նախագահ Հասան Ռոհանին։
«Երկրի դատական իշխանությունները պետք է ստեղծեն առանձին դատական կառույց, որի ղեկավարը կլինի պրոֆեսիոնալ դատավոր, քննելու համար ուկրաինական օդանավի կործանման հանգամանքները»,- Իրանի նախագահի խոսքերը մեջբերում է Press TV հեռուստաալիքը։
Ռոհանին ուկրաինական օդանավի կործանումն անվանել է «աններելի սխալ»։ Իրանի նախագահը միաժամանակ կարծիք է հայտնել, որ «միայն կոճակը սեղմողը չէ, որ պետք է պատասխանատվության ենթարկվի այդ աղետի համար»։ Նա նաեւ հավաստիացրել է, որ «ուկրաինական ինքնաթիռի կործանման հետաքննության արդյունքները կներկայացվեն հրապարակավ», տեղեկացնում է ՏԱՍՍ-ը։
