«Մարտի 1-ի» գործով նախորդ դատական նիստին պաշտպանական կողմի հասցեին հնչեցվել է սպառնալիք, որի վերաբերյալ երբ ժամանակը կգա, պաշտպանական կողմը կխոսի։ Այս մասին այսօր՝ հունվարի 14-ին, լրագրողների հետ զրույցում ասաց ՀՀ երկրորդ նախագահ, «Մարտի 1-ի» գործով ամբաստանյալ Ռոբերտ Քոչարյանի պաշտպան Ռուբեն Սահակյանը։
«Փաստաբանների կողմից, միանշանակ, ընկալվել է որպես սպառնալիք։ Դա հնչել է որպես սպառնալիք, որովհետեւ այսպիսի մոտավորապես խոսքեր էր, որ դուք կլինեք մեր օրին։ Ինչ քայլեր որ կձեռնարկենք, կմշակենք, կներկայացնենք դատարանին»,- ասաց պաշտպանը։
Հարցին՝ արդյոք պաշտպանները որեւէ քայլ ձեռնարկե՞լ են այս ուղղությամբ, Ռուբեն Սահակյանն ասաց. «Իսկ ինչո՞ւ պետք է ասեմ ձեզ։ Երբ կգա ժամանակը, կիմանաք»։
Հիշեցնենք, որ նախորդ դատական նիստին Պաշտպանության նախկին նախարար, «Մարտի 1-ի» գործով ամբաստանյալ Սեյրան Օհանյանի պաշտպանի ելույթում հնչած «Մարտի 1-ի ինչ-որ իրադարձություններ» արտահայտությունն առաջացրել էր տուժող կողմի վրդովմունքը։ Տուժող կողմի իրավահաջորդներից մեկն էլ, մասնավորապես, ասել էր․ «Թող հարգեն մարտի 1-ը եւ չփորձեն ինչ-որ այլ երեւույթներ պատկերացնել, թե չէ կհայտնվեն մեր օրին»։ Պաշտպանական կողմն արձանագրել էր, որ իր հասցեին սպառնալիք է հնչել։
Նշենք, որ այսօրվա դատական նիստը հետաձգվեց, քանի որ ՀԱՊԿ նախկին գլխավոր քարտուղար Յուրի Խաչատուրովի, «Մարտի 1-ի» գործով ամբաստանյալ Միհրան Պողոսյանը չէր ներկայացել այսօրվա նիստին՝ նախապես տեղեկացնելով այդ մասին նախագահող դատավոր Աննա Դանիբեկյանին։ Իր դիմումի մեջ նա նշել էր, որ դատարանն անտեսում է նիստի ընթացքում պաշտպանների հասցեին հնչող վիրավորական արտահայտություններն ու սպառնալիքները, ինչպես նաեւ խտրական վերաբերմունք է դրսեւորում դատավարության մասնակիցների նկատմամբ։