Այսօրվա դրությամբ մարզային հեռուստաընկերությունները կանգնած են ֆինանսական եւ տեխնիկական կայացման խնդրի առջեւ։ Այս մասին «Օրենսդրական փոփոխություններ տեսալսողական մեդիածառայությունների ոլորտում» թեմայով խորհրդարանական լսումների ժամանակ հունվարի 16-ին ասաց խորհրդարանի Գիտության, կրթության, մշակույթի եւ սփյուռքի հարցերի մշտական հանձնաժողովի հեռուստատեսության, ռադիոյի, մամուլի եւ տեղեկատվության ենթահանձնաժողովի նախագահ, կառավարող «Իմ քայլը» դաշինքի պատգամավոր Վահագն Թեւոսյանը։
Նրա խոստովանմամբ՝ մարզային մուլտիպլեքսների ստեղծումը խնդրահարույց է եւ կարող է բարձրացնել քաղաքական «ախորժակները»։ «Այս առնչությամբ առաջարկվում է ուշադրություն դարձնել միջմարզային մուլտիպլեքսների ձեւավորման հնարավորությանը։ Ինչ վերաբերում է մասնավոր մուլտիպլեքսների ստեղծման հնարավորությանը հանրապետական ծածկմամբ, ապա այդ հարցը, բարդության պատճառով, կարող է քննարկվել միայն ապագայում»,- խոստովանել է Թեւոսյանը։
Միեւնույն ժամանակ, նշել է պատգամավորը, առաջարկություններն ավելի հանգամանալից կներկայացնեն միայն այն ժամանակ, երբ վերջնականապես պատրաստ լինի օրենսդրական փոփոխությունների փաթեթը։
Նշենք, որ հանրային քննարկումների փուլում է օրինագիծը, որի համաձայն՝ անվճար մուլտիպլեքսի բոլոր հինգ հաճախականությունները պատկանելու են Հայաստանի Հանրային հեռուստատեսությանը։
