ՆԱՏՕ-ն Իտալիայի Սիգոնելա ավիաբազայում բացել է դաշինքի անօդաչու օդային հետախուզության առաջին համակարգը (Alliance Ground Surveillance, AGS): Այս մասին ՆԱՏՕ-ի գլխավոր քարտուղար Յենս Ստոլտենբերգը հայտնել է Սիցիլիա կղզում համակարգի բացման պաշտոնական արարողության ժամանակ, փոխանցում է ՏԱՍՍ-ը:
«Մենք այստեղ հավաքվել ենք, որ ողջունենք ցամաքի մակերեւույթին հետեւող [ԱՄՆ-ից] երկու անօդաչուների (RQ-4D Phoenix) ժամանումը,- հայտարարել է նա: - Համակարգը գործողության պատրաստ կլինի մի քանի ամիս հետո, եւս 3 դրոն կժամանեն մինչեւ տարեվերջ: Սա թույլ կտա հետեւել դաշինքի ամբողջ տարածքին եւ նրա սահմաններից դուրս՝ Արկտիկայից մինչեւ Սահել (արեւադարձային տափաստան Աֆրիկայում), Ատլանտիկայից մինչեւ Արեւելյան Եվրոպա»:
«Այս համակարգերը թույլ կտան ցանկացած եղանակի գրանցել եւ տեղեկություններ փոխանցել ցամաքի եւ ծովի մակերեւույթի վրա տեղաշարժերի մասին ու անգամ ականներ ու պայթուցիկ սարքեր հայտնաբերել: Այսօր ՆԱՏՕ-ն համալրել է իր հետախուզական հնարավորությունների կարեւորագույն բացը: Նախկինում այսպիսի հետախուզական համակարգեր ուներ ՆԱՏՕ-ի միայն մեկ երկիր (ԱՄՆ-ն), հիմա դաշինքի բոլոր պետությունները կարող են դրանցով գործողություններ կատարել: Այս համակարգը սպասարկելու է 600 մարդուց բաղկացած անձնակազմը»,- հայտարարել է դաշինքի գլխավոր քարտուղարը:
Նա ընդգծել է, որ AGS համակարգը ստեղծելիս «բարելավվել ու օպտիմալացվել են ամենաժամանակակից ռազմական տեխնիկայի ձեռքբերման սկզբունքները», որը դաշինքի բոլոր պետությունները պատվիրել են ԱՄՆ-ից:
Ըստ ՆԱՏՕ-ի տվյալների՝ RQ-4D Phoenix նվազ նկատելի հետախուզական անօդաչուների գործողության շառավիղը կազմում է 16 հազար կիլոմետր, դրանք կարող են առանց վայրէջք կատարելու ինքնավար թռչել ավելի քան 30 ժամ:
