Շիրակի մարզի Կառնուտ համայնքի բնակիչները բողոքի ակցիա են սկսել, նրանք փակել են ճանապարհը եւ բողոքում են, որ կարկտահարության վնասների փոխհատուցում տրամադրելիս տարբերակված մոտեցում է դրսեւորվել, մասնավորապես, օրինակ՝ Ախուրյան գյուղում կարկուտի հետեւանքով վնասի փոխհատուցումը ներառվել է ցուցակում, իսկ Կառնուտն անտեսվել է:
«Կարկուտը մեր հողերին խփել է, բայց մեզ չեն ներառում կարկտահարվածների ցուցակում ու բնակիչներից 40-ին դատի են տվել։ Գյուղացին մեկ ամսից պիտի հող մշակի, բայց չի կարող, որովհետեւ վարկ չի կարող վերցնել։ Հայաստանի 5 տոկոս բանջարեղեն մատակարարող գյուղն է սա, բայց հիմա 1 տոկոս էլ չենք կարող ցանել: Ասում են՝ քարը փեշներիցդ գցեք, գնացեք, ձեր տանը նստեք։ Ակնկալիք չկա, մենք այս մաֆիայի դեմ բան չենք կարող անել, Շիրակի մարզում հեղափոխություն չի եղել»,- նշեց բնակիչը՝ հավելելով, որ դիմում են գրել, բայց պատասխան դեռ չկա:
Գյուղացիները քննարկում են կառավարության մոտ ակցիա իրականացնելու տարբերակը:
Իր հերթին Կառնուտի համայնքապետի տեղակալ Լիպարիտ Տիգրանյանը նշել է, որ այստեղ 2-3 անձի խնդիր է, արտառոց բան չկա: