Թող բերեին, սպանդանոցներ սարքեին, նոր պարտադիր դարձնեին։ Այս մասին այսօր՝ հունվարի 21-ին, Արմավիրի մարզպետարանի գյուղատնտեսության և բնապահպանության վարչության պետ Արթուր Այվազյանի հետ հանդիպմանը դժգոհեցին գյուղացիները։

«Ոչ մի բան չեք մշակել, ժողովրդին տեղյակ չեք պահել, միանգամից պարտադրում եք։ Գիտե՞ք՝ դա ինչի է հանգեցնում, կաշառակերության։ Բացի այդ, ևս հավելյալ 10 հազար դնում եք գյուղացու վրա, խոզը 5000 դրամ է, բայց մի խոզ պահելու մեջ ես 5000 դրամ շահույթ չեմ ստանում, 5000 դրամ տամ սպանդանոցին, ես իմ վարկերը որտեղից փակեմ։ Եղա՞վ, որ ես զրոյով եմ աշխատում։ Թող խոշոր ֆերմերների համար լինի սպանդանոցը, թող գործի, մենք էլ կտեսնենք, եթե լավ է, անձամբ կգամ, կասեմ՝ կարամ ես էլ տանեմ սպանդանոց։ Թող բերեին սպանդանոցներ սարքեին, նոր պարտադիր դարձնեին»,- նշեց նա։ 

Այվազյանը հակադարձեց՝ վաղուց բոլորը գիտեին, որ սպանդանոցը հունվարի 15-ից պարտադիր է լինելու․  «Նախապես բոլորը գիտեին, որ անցնելու են սպանդանոցային մսի։ Այն մարզերում, որտեղ սպանդանոց չկար, գուցե ճիշտ կլիներ ժամանակ տային, սակայն մեր մարզում այդ խնդիրը չկա, մենք համապատասխան քանակությունն ունենք։ Մարզում այս պահին գործում է 4 սպանդանոց։ Եթե այսօր չէ, վաղը գործելու է։ Երեկ 15 մարդ ենք ընդունել, որոնք պատրաստ են սպանդանոց կառուցելու»։