ՀՀ երկրորդ նախագահ Ռոբերտ Քոչարյանի եւ ՀՀ նախկին փոխվարչապետ Արմեն Գեւորգյանի փաստաբանները չեն ներկայացել դատական նիստին՝ դա բացատրելով հնչեցված սպառնալիքների հանդեպ դատարանի ոչ պատշաճ վերաբերմունքով:
Ինչպես հայտնեց դատավոր Աննա Դանիբեկյանը, դատարանի ստացած հայտարարության մեջ փաստաբանները նշում են, որ հունվարի 9-ին դատարանը հնչեցված սպառնալիքներին պատշաճ կերպով չի արձագանքել: Այդ պայմաններում պաշտպանության կողմը կարծում է, որ զրկվել է իր գործառույթները լիարժեք կատարելու հնարավորությունից: Հիշեցնենք, որ նույն պատճառով նախորդ նիստը բաց թողեց Յուրի Խաչատուրովի փաստաբան Միհրան Պողոսյանը, ինչի հետեւանքով նիստը չկայացավ:
Բացասական պատասխան ստացավ դատավորի այն հարցը, թե կարո՞ղ ենք արդյոք Արմեն Գեւորգյանն ու Ռոբերտ Քոչարյանը նիստին այլ փաստաբանների հրավիրել: «Հաշվի առնելով այն, որ նիստը չի կարող անցկացվել նման պայմաններում, նիստը հետաձգվում է»,- հայտնեց դատավորը: Միեւնույն ժամանակ, նա անհրաժեշտ համարեց տուժող Հարությունյանից հետաքրքրվել, թե ինչ նկատի ուներ՝ հայտարարելով, որ «եթե Մարտի 1-ի մասին հարգանքով չարտահայտվեք, ինքներդ կհայտնվեք…»: Հարությունյանը վստահեցրեց, որ մտադիր չէր որեւէ մեկին սպառնալ: Նա նշեց, որ «իրենք չեն վիրավորել եւ խնդրում են իրենց եւս չվիրավորել»: Դատավորը հարցը սպառված համարեց եւ հիշեցրեց, որ եթե փաստաբաններն այլ կերպ են մտածում, կարող են դիմել համապատասխան մարմիններին:
Ապա դատավորն անցավ նախորդ նիստին փաստաբան Միհրան Պողոսյանի բացակայության իրավաչափության պարզաբանմանը՝ հաշվի առնելով պատժամիջոցներ կիրառելու մասին մեղադրող կողմի ներկայացրած միջնորդությունը: Լսելով փաստաբանին՝ դատավորը եզրակացրեց, որ փաստաբանը բացակայել է առանց իրավաչափ հիմքի, հրաժարվել է իր պարտավորությունների կատարումից, եւ պատժամիջոց կիրառեց նախազգուշացման տեսքով: Այդ մասին տեղեկացված է փաստաբանների պալատը:
Այսօր բացակայող փաստաբանների պահվածքը կքննարկվի հաջորդ նիստի ժամանակ, որը կկայանա փետրվարի 4-ին ժամը 13:00-ին:
