Ազգային անվտանգության ծառայության նախկին ղեկավար Գեորգի Կուտոյանը այս ավտորիտար համակարգի զոհն է։ Այս մասին այսօր՝ հունվարի 21-ին, լրագրողների հետ հանդիպմանն ասաց «Երկիր Ծիրանի» կուսակցության նախագահ Զարուհի Փոստանջյանը։
«Ինքնասպանության հասցնելու հանցակազմով է գործը հարուցվել, սակայն սպանել են թե հասցրել են ինքնասպանության, սպանություն է, մենք դա պետք է արձանագրենք։ Ինչպես է դեպքը տեղի ունեցել, իհարկե կարեւոր է, բայց մենք պետք է արձանգրենք, որ նախկին բարձրաստիճան պաշտոնյան սպանվել է։ Այս սպանության բացահայտումը իրավապահների պարտականությունն է, եթե պետությունը չի պաշտպանում մարդու կյանքի իրավունքը, ապա պետությունն ինքն է դառնում հանցակից տվյալ հանցագործության։ Սա մտահոգիչ է վտանգավոր ահազանգ է բոլորի համար։ Առաջին հերթին ցավակցում եմ տիկնոջը, ծողներին, հարազատներին»,-նշեց նա։
Փոստանջյանի կարծիքով՝ Կուտոյանը շարունակաբար կիրառվող եւ ընթացող ապօրինությունների զոհն է․ «Չնայած այն հանգամանքին ես 2016 թվականին, երբ Սերժ Սարգսյանը հրամանագիր արձակեց եւ Կուտոյանին նշանակեց ԱԱԾ ղեկավար, ես այս հրամանագիրը վիճարկել եմ Վարչական դատարանում, իհարկե դատարանը ապօրինի կերպով վարույթ չընդունեց, սակայն պարոն Կուտոյանը ԱԱԾ տնօրենի չափանիշներին չէր համապատասխանում։ Պարոն Կուտոյանը զոհն է այս ավտորիտար համակարգի։ Նա շարունակաբար կիրառվող եւ ընթացող ապօրինությունների զոհն է։ Ոչ մի ներկա կամ նախկին բարձրաստիճան պաշտոնյա չի կարող պաշտպանված լինել, եթե մենք մեր երկրում չունենքն հակակշիռների եւ զսպումների մեխանիզմ»։
Նա նաև շեշտեց՝ Կուտոյանը լուրջ ինֆորմացիայի կրող էր․ «Կուտոյանը մասնակից էր ՊՊԾ գնդի բանակցություններին, ինձ համար այդպես էլ անհասկանալի մնաց, թե ինչպես Նիկոլ Փաշինյանին թույլ տվեցին մտնել ՊՊԾ գնդի տարածք և այնտեղից ուղիղ եթերով հանդես գալ, որովհետև նույն օրը երբ իմացա, ես ինքս դիմել եմ, որ մտնեմ ՊՊԾ գունդ, բայց որևէ մեկը թույլ չէր տալիս մտնել։ Կամ ինչպես տեղի ունեցավ իշխանության փոխանցումը, Կուտոյանը տեղյակ է եղել, որ գրավում են ռադիոտունը, ինչո՞ւ միջոցներ չեն ձեռնարկվել։ Բացի այդ, ապրիլյան պատերազմը»։
