Անվտանգության հարցերով մասնագետները Internet Explorer բրաուզերում վտանգավոր խոցելիություն են գտել: Microsoft-ն արդեն արձագանքել է տեղեկությանը եւ խոստացել անվտանգության փաթչ թողարկել, հայտնում է TechCrunch-ը:
Բրաուզերի համակարգում լուրջ ճեղքին ուշադրություն են դարձրել մի քանի ընկերություններ, ներառյալ չինական Qihoo 360 գործակալությունը եւ ԱՄՆ արտակարգ պատրաստության համակարգչային թիմը (US-CERT): Հաշվետվություններում նշվում է, որ չարամիտները Internet Explorer-ի սխալից օգտվում են համակարգչի օպերատիվ հիշողությունը մշակելիս, ինչի շնորհիվ կարող են թափանցել համակարգի մեջ: Հաքերները հնարավորություն ունեն հեռվից կառավարել համակարգիչը եւ անձնական տվյալներին հասանելիություն ստանալ:
Ո՛չ Qihoo 360-ը, ո՛չ US-CERT-ը չեն հստակեցրել, թե չարամիտներն ինչպես են օգտագործել բրաուզերի սխալը եւ քանի համակարգչի վրա են հարձակվել: Microsoft-ը հայտարարել է, որ տեղյակ է խոցելիությանը եւ աշխատում է անվտանգության փաթչի վրա: TechCrunch-ի կանխատեսմամբ՝ փաթչը կհայտնվի Windows-ի անվտանգության պարբերական թարմացումների թվում՝ նախատեսված փետրվարի 11-ին:
Microsoft-ից հայտնել են, որ կոտրելու վտանգի են ենթակա Internet Explorer-ի եւ Windows-ի բոլոր օգտատերերը: Ընկերությունը որպես անվտանգության միջոց առաջարկել է անցնել նոր սերնդի բրաուզեր Microsoft Edge-ին:
