ԱՄՆ նախագահ Դոնալդ Թրամփը կնախընտրեր ԱՄՆ Սենատում իր դեմ իմպիչմենթի հարցով ավելի երկարատեւ հետաքննություն, սակայն կարծիք է հայտնել, որ այդ հարցով որոշում պետք է ընդունեն օրենսդիրները:
«Ես դա թողնում եմ Սենատի հայեցողությանը: Սակայն ես կնախընտրեի ավելի երկարատեւ ուղի»,- նրա խոսքը մեջբերում է «Ամերիկայի ձայնը»:
Չորեքշաբթի գիշերը Սենատը նաեւ հաստատել է իմպիչմենթի հարցով հետաքննության անցկացման կարգը:
Ըստ կարգի, որն առաջարկել է հանրապետական մեծամասնության առաջնորդ Միթչ ՄքՔոնելը, կողմերի ելույթների համար կտրվի 48 ժամ՝ 24 ժամ յուրաքանչյուրի համար: Ընդհանուր առմամբ դրա համար կպահանջվի 6 օր:
Միեւնույն ժամանակ, սենատորներն արգելափակել են դեմոկրատների առաջնորդ Չակ Շումերի 3 տարբեր առաջարկները՝ կապված Ուկրաինայի հետ Թրամփի շփումների առնչությամբ Սպիտակ տնից, Պետդեպարտամենտից եւ վարչական-բյուջետային վարչությունից փաստաթղթեր եւ տեղեկություն պահանջելու հետ:
