ՀՀ փոխվարչապետ Տիգրան Ավինյանը կարողացել է ազդել ՀՀ վարչապետ Նիկոլ Փաշինյանի վրա եւ հասնել ԱԱԾ նախկին տնօրեն Արթուր Վանեցյանի պաշտոնանկությանը։ Այս մասին գրում է alternativ.am-ը։
Նիկոլ Փաշինյանը չի տիրապետում իրավիճակին։ Նրան կարողանում են մոլորեցնել իր իշխանության ներսում ձեւավորված բոլոր թիմերը։ Միջթիմային այս պայքարում ամենաստացված օպերացիան իրականացրել է փոխվարչապետ Տիգրան Ավինյանի թիմը։ Նրանք լավ մշակված ծրագրի միջոցով իշխանական վերնախավից հեռացրին ԱԱԾ նախկին տնօրեն Արթուր Վանեցյանին։
Օդում կախված լուրերի համաձայն՝ Ավինյանի թիմը հատուկ այս նպատակով ձեւավորել է շտաբ, որի կազմում են եղել փոխվարչապետի աշխատակազմի ղեկավար Վարագ Սիսեռյանը, «Իրազեկ քաղաքացիներ» հ/կ նախագահ Դանիել Իոաննիսյանը, Հանրային հեռուստաընկերության լրագրող Մկրտիչ Կարապետյանը։ Այլ անդամներ եւս եղել են, բայց առանցքայինները սրանք են եղել։ Մեզ հասած տեղեկություններով՝ շտաբի աշխատանքները կոորդինացրել է Վարագ Սիսեռյանը։ Հենց նա է խնդրել Կենտրոնական բանկին, որ Զանգեզուրի պղնձամոլիբդենային կոմբինատի մասին բանկի դեպոզիտարիումում առկա տեղեկությունը փոխանցվի Մկրտիչ Կարապետյանին, որն այն օգտագործել է Վանեցյանի մասին հայտնի ռեպորտաժում (այն Հ1-ով հեռարձակվել է Վանեցյանի հրաժարականից հետո)։
Վարագ Սիսեռյանը պարբերաբար հանդիպել է Դանիել Իոաննիսյանին եւ Վանեցյանի մասին տեղեկություններ փոխանցել, որոնց մասին վերջինս խոսել է տարբեր հաղորդումների ժամանակ։ Ավինյանի հակավանեցյանական շտաբը ԱԱԾ նախկին պետի դեմ տեղեկություններ է տրամադրել նաեւ այլ լրատվամիջոցների։
Երկարատեւ աշխատանքի շնորհիվ ի վերջո Ավինյանը կարողացել է ազդել Փաշինյանի վրա եւ հասնել Վանեցյանի պաշտոնանկությանը։
Վանեցյանի պաշտոնանկությունն ապացուցել է, որ Փաշինյանի վրա ներգործելու՝ Ավինյանի շտաբի սխեման աշխատում է, եւ չի բացառվում, որ առաջիկայում այլ ուղղությամբ գործի դրվի։