Սոցիալական ցանցերը դարձել են ծայրահեղականության տնկարան, որն օգտագործվում է ժողովրդավարության խափանման համար, հայտարարել է Քոֆի Անանի Թվային տեխնոլոգիաների դարաշրջանում ընտրությունների եւ ժողովրդավարության հարցերով հանձնաժողովը, հայտնում է Reuters-ը։
Հանձնաժողովի զեկույցի մեջ նշվում է, որ կարգավորողների կամ օպերատորների կողմից չստուգված քաղաքական կուսակցությունները, խորհրդատուները եւ արտասահմանյան գործակալները սոցիալական ցանցերն օգտագործել են որպես զենք։ «Ապատեղեկատվությունը օգտագործվել է նրա համար, որպեսզի խեղաթյուրի ժողովրդավարական ինստիտուտները, անվստահություն սերմանի հասարակությունում եւ հարձակվի քաղաքական թեկնածուների վրա»,- ասվում է զեկույցում։
Հանձնաժողովը ներկայացրել է առաջարկությունների երկար ցուցակ, որոնք թույլ կտան կառավարական եւ ոլորտային մարմիններին ստուգել սոցցանցերի գործունեությունը, ինչպես նաեւ կպահանջեն նրանցից ներքին վերահսկողություն։
«Վերջին տարիներին արտասահմանյան պետությունների կառավարությունները սոցիալական ցանցերն ու ինտերնետն օգտագործել են ամբողջ աշխարհում ընտրություններին միջամտելու համար»,- ասվում է Քոֆի Անանի հանձնաժողովի զեկույցում։
