Ավստրալիայի վթարային ծառայությունները ինքնաթիռներից մեկի հետ կապը կորցրել են, որը մեծածավալ անտառային հրդեհների մարման աշխատանքներ էր կատարում մայրցամաքի արեւելքում: Այս մասին հայտնել է Նոր Հարավային Ուելս նահանգի տարածքային հրշեջ ծառայությունը, որը համապատասխան հայտարարությունը հրապարակել է Twitter-յան իր էջում, փոխանցում է ՏԱՍՍ-ը:
«Նոր Հարավային Ուելսի տարածքային հրշեջ ծառայությունը հետաքննում է հրշեջ ինքնաթիռի մասնակցությամբ լուրջ պատահարի մասին տեղեկությունները, որը նահանգի տարածքում տեղի է ունեցել այսօր: Կապը կորել է մեծ օդային լցանավի հետ, որն աշխատում էր Սնոուի-Մոնարո շրջանում (Կանբերայից 100 կմ հարավ): Մտավախություն կա, որ հրշեջ ինքնաթիռը կործանվել է կրակի դեմ պայքարում: Ենթադրյալ վթարի վայրում ուղղաթիռներով որոնումներ են կատարվում»,- նշված է գերատեսչության հաղորդագրության մեջ:
Անտառային հրդեհներն Ավստրալիայում նորից ակտիվացել են շոգ եւ չոր եղանակի վերադառնալու պատճառով։ Ինչպես տեղեկացնում է Նոր Հարավային Ուելսի (NSWRFS) տարածաշրջանային հրշեջ ծառայությունը, նախազգուշացվել են նահանգի մի շարք շրջաններ, որոնք գտնվում են հարավ-արեւմուտքում, Ավստրալիայի մայրաքաղաքի տարածքին մոտ, եւ Սիդնեյի երկու արվարձաններ հյուսիս-արեւմուտքում՝ քաղաքի կենտրոնից 40 կիլոմետր հեռավորության վրա։
«Այսօր մենք վերադառնում ենք այն պայմաններին, որոնք եղել են վերջին մի քանի ամիսներին»,- հինգշաբթի ասել է Նոր Հարավային Ուելսի նահանգի արտակարգ ծառայությունների նախարար Դեւիդ Էլիոթը, որը տարածաշրջանի բնակիչներին կոչ է արել հատուկ զգոնություն ցուցաբերել։
Բարդ է մնում իրավիճակը Ավստրալիայի մայրաքաղաքային տարածքում, որտեղ նախօրեին անտառային հրդեհի գոտում են հայտնվել Կանբերայի արեւելյան արվարձաններն ու մայրաքաղաքի Քվինբեյան արբանյակ-քաղաքի արեւմտյան շրջանները։ Ներկա պահին արտակարգ դրության մասին նախազգուշացումներ թողարկվել են Կանբերայի Կալարու, Պիոլիգո, Ռեդվուդ, Բիրդ, Հարման, Քրեսթվուդ եւ Օաքս-Էսթեյթ արվարձանների բնակիչների համար։
«Անհապաղ ապաստան գտեք։ Հիմա արդեն չափազանց ուշ է հեռանալու համար։ Կրակը սպառնալիք է ներկայացնում կյանքի համար։ Մարդիկ Բիրդ, Հարման, Քրեսթվուդ եւ Օաքս-Էսթեյթ արվարձաններում վտանգի մեջ են եւ անհապաղ թաքնվելու կարիք ունեն, քանի որ կրակը մոտենում է»,- նշված է Ավստրալական մայրաքաղաքային տարածքի վթարային ծառայության (ESA) հաղորդագրությունում։
Տարածաշրջանում փակ են ճանապարհները, եւ մասամբ դադարեցվել է էլեկտրականության մատակարարումը, կան երկաթուղային երթեւեկության խափանումներ։ Կանբերայի միջազգային օդանավակայանը ժամանակավորապես դադարեցրել է աշխատանքը թանձր ծխի պատճառով։