Չորեքշաբթի Կանադայի դատարանը որոշել է գերմանական Volkswagen կոնցեռնին տուգանել 149,5 մլն դոլարով՝ ընկերության ավտոմեքենաների արտաժայթքման գազերի մեջ պարունակվող վնասակար նյութերի մասին տվյալների մանիպուլյացիաների վերաբերյալ գործով, հայտնում է Reuters-ը:
Գործակալության տեղեկություններով՝ ընկերությունն իր մեղքն ընդունել է: Դատախազ Թոմ Լեմոնը հայտարարել է, որ տուգանքի չափն «աննախադեպ» է: «Այն [տուգանքի գումարը] 26 անգամ գերազանցում է շրջակա միջավայրի դեմ հանցագոծությունների համար ամենամեծ դաշնային տուգանքը»,- հավելել է նա:
Ավտոմեքենաշինական կոնցեռնից հայտարարել են, որ որպես տուգանք վճարված միջոցները կհատկացվեն բնապահպանության հետ կապված ազգային եւ նահանգային նախագծերի աջակցությանը:
Ընկերությանն ավելի վաղ՝ դեկտեմբերին մեղադրանքներ էին առաջադրել, որ Կանադա է ներմուծել ավելի քան 180 հազար ավտոմեքենա, որոնք չեն համապատասխանել արտաժայթքման գազերում վնասական նյութերի թույլատրելի պարունակության մասին բնապահպանական ստանդարտներին:
Դիզելային սկանդալը, որի կենտրոնում սկզբնապես հայտնվել էր Volkswagen-ը, բռնկվել էր 2015 թվականին: Պարզվել է, որ կոնցեռնի ավտոմեքենաները հագեցած էին ծրագրային ապահովմամբ, որը թույլ է տվել նվազեցնել արտաժայթքման գազերի մեջ վնասակար նյութերի պարունակության ցուցանիշները: Իրականում դրանք մի քանի անգամ գերազանցում էին օդի աղտոտման սահմանված առավելագույն մակարդակը:
