Երեւանի քաղաքապետարանի կողմից իրականացվել է վթարային շենքերի բնակիչների հաշվառում եւ մշակվել է սոցիալական բնակարանային ֆոնդի ծրագիր: Այս մասին այսօր` ապրիլի 15-ին հայտարարել է Երեւանի քաղաքապետ Կարեն Կարապետյանը` Ազգային սոցիալական բնակարանային ասոցիացիայի խորհրդի անդամների հետ հանդիպման ժամանակ:
Քաղաքապետարանի մամուլի ծառայությունից NEWS.am-ին հայտնում են, որ Ազգային սոցիալական բնակարանային ասոցիացիայի խորհրդի անդամ Հենկ Վեստրան նշելով, որ սոցիալական բնակարանաշինության խնդիրը բնորոշ է բոլոր մեծ քաղաքներին, Կ. Կարապետյանին է ներկայացրել ասոցիացիայի կողմից իրականացվող սոցիալական ծրագրերը, որոնց նպատակը ցածր եւ միջին եկամուտներ ունեցող ընտանիքներին օժանդակելն է բնակարան ձեռք բերելու հարցում:
Ըստ քաղաքապետի, սոցիալական բնակարանային ֆոնդի ծրագրով նախատեսվում է ներկայում չօգտագործվող վարչական շենքերը բնակելի դարձնելու տարբերակը:
«Այս հարցում քաղաքապետարանը բաց է եւ պատրաստ քննարկելու ներդրումային ցանկացած ծրագիր»,- նշել է քաղաքապետը: