Արցախում վիրավորում ստացած զինծառայող Հենրի-Հայկ Զաքարյանը վիրահատվել է: Այս մասին մամուլի ասուլիսի ժամանակ հայտնեց ՀՀ ՊՆ ռազմաբժշկական վարչության պետ Սահակ Օհանյանը:
Նրա խոսքով՝ վիրահատությունն ավարտվել է 1,5 ժամ առաջ, վիրահատությունը հաջող է անցել, սակայն զինծառայողի վիճակը մնում է կայուն ծանր:
Նա գտնվում է Մարտակերտի հոսպիտալում, ապա կտեղափոխվի Ստեփանակերտ: Երբ վիճակը կայունանա, կքննարկվի Երեւան նրա տեղափոխման հարցը ռեանմոբիլով կամ ուղղաթիռով, եթե արցախցի գործընկերները դիմեն նման հարցով: «Ստեփանակերտի հոսպիտալն ունի անհրաժեշտ բոլոր սարքավորումները: Երեւան տեղափոխումը պայմանավորված է նրանով, որ բուժման յուրաքանչյուր փուլ ենթադրում է գտնվել համապատասխան բուժհաստատությունում»,- ասաց Օհանյանը:
Ինչպես ավելի վաղ հաղորդվել է, հունվարի 24-ին՝ ժամը 06:55-ի սահմանում, ՊԲ հյուսիային ուղղությամբ տեղակայված զորամասերից մեկում դեռեւս չպարզված հանգամանքներում հրազենային վիրավորում են ստացել ՊԲ զինծառայողներ, 2001թ. ծնված Հենրի-Հայկ Զաքարյանը եւ 2000թ. ծնված Արմեն Մեսրոպյանը: Վիրավորում ստացած զինծառայող Հենրի-Հայկ Զաքարյանի վիճակը գնահատվում է ծանր: Դեպքի մանրամասները պարզելու համար կատարվում է քննություն: