ՀՀ գյուղատնտեսության նախարարի նախկին օգնական, Ռոբերտ Քոչարյանի աջակից  Նարեկ Մանթաշյանը եւ նրա փաստաբան Ալեքսանդր Կոչուբաեւն այսօր՝ հունվարի 29-ին, ՀՀ դատախազություն հաղորդում են ներկայացրել՝ կապված «Մարտի 1-ի» իրադարձությունների հետ։

Լրագրողների հետ զրույցում Նարեկ Մանթաշյանն ասաց, որ «Մարտի 1-ի» իրադարձություններին տեղի ունեցած բախումները հրահրել են ԱԺ մի խումբ նախկին պատգամավորներ. «Մեր հաղորդումը վերաբերում է Հանրային խորհրդի ներկայիս նախագահ Ստյոպա Սաֆարյանին, որը, ըստ wikileaks-ի հրապարակումների՝ զբաղվել է խառնակչությամբ, ժողովրդի շրջանում հույզեր է հրահրել, ինչը բերել է ամբոխին հատուկ ձեւով հարձակումների՝ ոստիկանության վրա։ Ամեն ինչ սկսվել է այն բանից հետո, երբ պատգամավորներ Ստյոպա Սաֆարյանը, Անահիտ Բախշյան եւ նրանց հարող որոշ շրջանակներ ժողովրդի մեջ սուտ ու կեղծիք են տարածել, թե կան զոհեր, երբ նույնիսկ վիրավոր չկար»։

Ալեքսանդր Կոչուբաեւն էլ շեշտեց, որ իրենց ներկայացրած հաղորդում այնքան կարեւոր տեղեկատվություն ունի, որ «Մարտի 1-ի» գործի վերանայման անհրաժեշտություն է առաջանալու.

«Ձեռք բերվեցին անհերքելի փաստական հանգամանքներ, որոնք «Մարտի 1-ի» գործի վրա նոր լույս են նետում։ Այսօր մենք հանցագործության մասին հաղորդում ներակայացրինք։ Անձի անմեղության կանխավարկածը հարգելու նկատառմամբ՝ անուններ չեմ հրապարակի։ Երբ մեր մեղադրական եզրակացությունները կհիմնավորվեն առավել համապարփակ տեղեկատվություն կփոխանցեմ։ «Մարտի 1-ի» բախումները եղել են նախապես հրահրված: Բացի wikileaks-ի հրապարակումների ճշմարտացիությունն ապացուցելը, ձեռք ենք բերել նաեւ այլ փաստական հանգամանքներ։ Դրանք փոխանցվել են մասամբ, քանի որ վստահության փոքր խնդիր առաջացավ»։