Առանձին երկրների կողմից երկակի ստանդարտների կիրառումը նախադրյալներ է ստեղծում ռազմական ուժի շեմի նվազեցման համար, դրա օրինակ է իրանա-ամերիկյան հարաբերությունների սրումը: Այս մասին Բիշքեկ-Երեւան-Մինսկ-Մոսկվա տեսակամուրջի ժամանակ հայտարարել է ՀԱՊԿ միացյալ շտաբի պետ, գեներալ-գնդապետ Անատոլի Սիդորովը:
Նրա խոսքով՝ ԱՄՆ-ը շարունակում է սպառազինությունների մրցավազք սադրել, ինչի դրսեւորում է Վաշինգտոնի կողմից «Միջին ու փոքր հեռահարության հրթիռների ոչնչացման մասին» պայմանագրի խախտումն ու ցամաքային բազավորման բալիստիկ հրթիռի փորձարկումը, որն արգելված է այդ փաստաթղթով:
«Բացի այդ, ամերիկացիները որեւէ միջոց չեն ձեռնարկում СНВ-3 պայմանագրի գործողության ժամեկտի ավարտի կապակցությամբ ռազմավարական սպառազինությունների վերահսկման հարցով նոր համաձայնագրի մշակման ուղղությամբ: Նման քայլերը խոսում են ռազմավարական հարձակողական սպառազինությունները ամրապնդելու ԱՄՆ մտադրության մասին»,- ասել է նա:
Սիդորովը հավելել է, որ ԱՄՆ-ը եւ ՆԱՏՕ-ի նրա դաշնակիցները մեծացնում են նաեւ Եվրոպայում իրենց հարվածային պոտենցիալը: «Տարիներ շարունակ ՀԱՊԿ անդամ պետությունների անմիջական հարեւանությամբ ամրապնդվում է զորքերի խմբավորում՝ կազմված 12 հազար մարդուց եւ 700 միավոր զինտեխնիկայից, տեղակայված հիմնականում Լեհաստանում եւ Մերձբալթիկայում: Բացի այդ, արդիականացվում են աա ռազմական ենթակառուցվածքները Գերմանիայում, Բուլղարիայում, Ռումինիայում, Լեհաստանում եւ Բալթյան երկրներում՝ ուղղված բազմազգ զինվորական կազմավորումների հնարավորությունների ընդլայնմանը»,- ասել է նա:
