Ռուսաստանի նախագահ Վլադիմիր Պուտինը եւ Գերմանիայի դաշնային կանցլեր Անգելա Մերկելը հեռախոսով քննարկել են պաղեստինա-իսրայելական հակամարտության կարգավորման ամերիկյան ծրագիրը (այսպես կոչված՝ դարի գործարքը): Գերմանական կողմի նախաձեռնությամբ տեղի ունեցած հեռախոսային զրույցի մասին հայտնել է Կրեմլի մամուլի ծառայությունը:
«Այլ հրատապ թեմաների թվում անդրադարձ է կատարվել Ուկրաինայի եւ Սիրիայի իրավիճակին, ինչպես նաեւ մերձավորարեւելյան խաղաղ գործընթացի հիմնախնդիրներին: Այս համատեքստում առաջնորդները կարծիքներ են փոխանակել պաղեստինա-իսրայելական հակամարտության կարգավորման ամերիկյան պլանի կապակցությամբ»,- նշված է Կրեմլի մամուլի ծառայության հաղորդագրության մեջ:
Պուտինը Մերկելի հետ քննարկել է նաեւ հունվարի 19-ին Բեռլինում տեղի ունեցած Լիբիայի հարցով համաժողովում ձեռք բերված պայմանավորվածությունների իրականացման հարցը: «Ռուսաստանի նախագահը նշել է ընդունված որոշումները լիբիական կողմերի հետ համաձայնեցնելու անհրաժեշտությունը, ինչը կարեւոր է ՄԱԿ ԱԽ-ում դրանց հետագա քննարկման եւ հաստատման համար,- նշված է հաղորդագրության մեջ: - Երկու կողմն էլ ընդգծել է միջազգային հանրության ջանքերի մեծացման նպատակահարմարությունը ռազմական գործողությունների դադարեցման կայուն ռեժիմի ապահովման եւ քաղաքական երկխոսության գործարկման շահերի շրջանակում»:
