Ըստ ֆինանսական հաշվետվությունների միջազգային ստանդարտների (IFRS)՝ ընկերությունները պարտավոր են պարբերաբար անցկացնել երկարատեւ հեռանկարում իրենց ապագա դրամական հոսքերի գնահատում եւ ստացած տվյալներն արտացոլել ֆինանսական հաշվետվություններում։
Beeline-ի տարածած հաղորդագրության մեջ նաեւ ասվում է. «Որպես միջազգային խմբի մի մաս, ընկերությունը հետեւողական է մոտեցել այդ պահանջին եւ, հաշվի առնելով հեռահաղորդակցության ոլորտի համաշխարհային միտումները ու մեր շուկայի իրողությունները, շատ խիստ է գնահատել իր ակտիվների արժեքի ապագա հնարավոր անկումը։ Հետեւաբար 2018 թ. մենք վերանայեցինք մեր գնահատականները եւ ավելի պահպանողական մոտեցում ցուցաբերեցինք: Համապատասխանաբար, դա արտացոլվեց ֆինանսական հաշվետվություններում, որպես լրացուցիչ կանխատեսումային ծախս, որը փաստացի տեղի չի ունեցել։
Ինչ վերաբերում է փաստացի տարեկան գործառնական ցուցանիշներին, ապա 2018 թ. դրամական զուտ հոսքերը դրական են, իսկ շահույթը՝ նախքան տոկոսը, հարկերը, մաշվածությունը եւ ամորտիզացիան (EBITDA) կազմել է 8,6 մլրդ AMD:
Հավելենք նաեւ, որ 2019 թ․ Հայաստանում Beeline-ն ընդգրկվել է խոշոր հարկատուների տասնյակում»: