Հայաստանի ֆուտբոլի ֆեդերացիայի նախկին նախագահ Ռուբեն Հայրապետյանը երեկ հարցանքննվել է ՀՖՖ-ի չարաշահումների քրեական գործով։ Այս մասին այսօր՝ փետրվարի 4-ին, լրագրողների հետ զրույցում ասաց նրա փաստաբան Ամրամ Մակինյանը։
Նշենք, որ այսօր Հայրապետյանը բերման է ենթարկվել ՀՀ ոստիկանություն, նրա փաստաբանի խոսքով, առանց հիմքեր ներկայացնելու։ Այդ մասին հեռախոսով պաշտպանին հայտնել է անձամբ Ռուբեն Հայրապետյանին։
«Նա ինձ հասցրեց փոխանցել միայն, որ իրեն բերման են ենթարկում քրեական ոստիկանություն: Ինձ, 15 րոպե է արդեն, ինչ չի հաջողվում ներս մտնել և իրավաբանական օգնություն ցույց տալ պարոն Հայրապետյանին: Այս պահին «պաշտոնական» պատճառաբանությունը հետևյալն է՝ պետը տեղում չէ, որ անցագիր իջացնի»,- լրագրողների հետ զրույցում ասաց Ռուբեն Հայրապետյանի պաշտպան Ամրամ Մակինյանը՝ հավելելով, որ սա առաջին դեպքը չէ, և ինքը Ոստիկանության ուշադրությունը ուզում է հրավիրել, որ եթե պետը տեղում չէ, ու հնարավոր չէ ապահովել անձանց իրավաբանական օգնությունը, ուրեմն թող օպերատիվ-հետախուզական միջոցառումները կազմակերպեն այն ժամանակ, երբ պետը տեղում է:
Վերջինս նշեց նաև, որ լրագրողներն արդեն իրեն ասել են, որ Քննչական կոմիտեն արդեն իսկ պաշտոնապես հաստատել է, որ բերման ենթարկելու գործողությունը որևէ առնչություն չունի ՀՖՖ քրեական գործի հետ: Ասեմ ավելին, պարոն Հայրապետյանն այդ գործով երեկ հարցաքննվել է՝ որպես վկա եւ տվել է ցուցմունքներ այդ առերեւույթ դեպքի հետ կապված։
Որոշ ժամանակ անց դեռևս Ամրամ Մակինյանին չէր հաջողվել տեսնել իր պաշտպանյալին: «Սա ամենացցուն օրինակն է այն բանի, որ ՀՀ-ն վազելով գնում է դեպի տոտալիտար ռեժիմ»,- նկատեց պաշտպանը:
Հիշեցնենք, որ ՀՀ քննչական կոմիտեն «Հայաստանի ֆուտբոլի ֆեդերացիա» ԻԱՄ-ի պատվերով ՀՖՖ նախկին նախագահ Ռուբեն Հայրապետյանին փաստացի պատկանող «Զեյթունի կահույքի ֆաբրիկա» ԲԲ ընկերության կողմից մարզադաշտերի կառուցման ընթացքում թույլ տրված չարաշահումներ դեպքերի առթիվ քննվող քրեական գործի նախաքննության շրջանակներում ՀՀ ոստիկանության ԿՀԴՊ ԳՎ աշխատակիցների հետ համատեղ ձեռնարկված մեծածավալ քննչական եւ դատավարական գործողությունների ընթացքում տվյալներ են ձեռք բերվել, 2012-2018թթ. ընթացքում «Հայաստանի ֆուտբոլի ֆեդերացիա» ԻԱՄ-ի հետ համագործակցության ընթացքում կնքված կապալի պայմանագրերի շրջանակներում Սիսիան, Սեւան, Վանաձոր, Արմավիր, Վաղարշապատ, Գյումրի եւ Ներքին Կարմիր Աղբյուր համայնքների վարչական տարածքներում ֆուտբոլի մարզադաշտերի ու մարզադպրոցների կառուցման եւ վերանորոգման աշխատանքներն իրականացրած կապալառու «Զեյթունի կահույքի ֆաբրիկա» ԲԲԸ տնօրենի եւ «Հայաստանի ֆուտբոլի ֆեդերացիա» ԻԱՄ-ի կողմից այդ աշխատանքների նկատմամբ տեխնիկական հսկողություն իրականացրած աշխատակցի կողմից՝ պատվիրատու «Հայաստանի ֆուտբոլի ֆեդերացիա» ԻԱՄ-ից միասնական դիտավորությամբ, պաշտոնեական դիրքի օգտագործմամբ խարդախության եղանակով առանձնապես խոշոր չափերով հափշտակություն կատարելու վերաբերյալ: