ԵԽԽՎ համազեկուցողների եւ Վենետիկի հանձնաժողովի նախագահի հայտարարությունները սեպագիր արձանագրություն չեն, որ այդքան դժվար մեկնելի լինի։ Այս մասին, այսօր՝ փետրվարի 4-ին, ԱԺ-ում լրագրողների հետ հանդիպման ժամանակ նշեց ԵԽԽՎ-ում հայկական պատվիրակության անդամ, ԲՀԿ խմբակցության պատգամավոր Նաիրա Զոհրաբյանը:
«Ես շատ հստակ հասկացել եմ հայտարարությունը։ Նախ ուզում եմ ասել, որ այս հայտարարությունները պետք չէ որակել որպես ինչ-որ մեկի պարտություն, ինչ-որ մեկի հաղթանակ, ինչ-որ մեկին ասֆալտին են փռել։ Պետք չի այս հայտարարությունների, աշխատանքային խորհուրդների, առաջարկությունների նոմինալ արժեքը դարձնել քաղաքական գործոն: Բայց ես այդ հայտարարությունները հասկացել եմ այնպես, ինչպես Էդմոն Մարուքյանը: Ես էլ իրավունք ունեմ այդ «սեպագիր արձանագրությունը» մեկնաբանել այնպես, ինչպես ես եմ հասկացել. Օրինակ, ես վստահ եմ, որ հայտարարությունը, որ պետք է բացառել ցանկացած անհարկի կամ անձնական ճնշում դատավորների վրա, ուղղված է իշխանություններին»,-ասաց Նաիրա Զոհրաբյանը:
Նա հավելեց, որ եթե անգամ այս հայտարարությունները չլինեին, առանց դրա էլ հասկանալի է, որ անհարկի շահարկելով հարցը, բարձրացնելով մեկ անձի նոմինալ արժեքը, ՍԴ-ի հարցը սարքել են երկրի թիվ մեկ հարցը» «Եթե շարունակվի այս աշխատաոճը, Հայաստանի հարցով զեկույցում գնահատականներն ավելի խիստ են լինելու»: