Ես չեմ կարծում, որ վարչապետի գործառույթների մեջ է մտնում որեւէ քրեական գործով կասկածյալների հետ զրուցելը: Այս մասին այսօր՝ փետրվարի 5-ին, ԱԺ-ում լրագրողների հետ զրույցում նշեց «Լուսավոր Հայաստան» խմբակցության պատգամավոր Գեւորգ Գորգիսյանը՝ անդրադառնալով նախկին գլխավոր դատախազ Գեւորգ Կոստանյանի հայտարարությանը, որ պատրաստ է վերադառնալ Հայաստան եւ հրապարակային պատասխանել նախաքննական մարմնի բոլոր հարցերին: Կոստանյանն առաջարկել է կազմակերպել հրապարակային քննարկում ՀՀ վարչապետի մոտ կամ իր մասնակցությամբ ուղիղ հերառձակմամբ:
«Եթե Գեւորգ Կոստանյանն ունի ասելիք, նա կարող է դա ասել քննչական մարմիններին: Ի վերջո, նա կարող է դիմել լրատվամիջոցների օգնությանը: Եթե մարդ ասելիք ունի, նա կարող է դա տեղ հասցնել որեւէ միջոցով եւ եթե այս ասելիքը կարեւոր լինի, դա անմիջապես բոլորի ուշադրությունը կգրավի՝ անկախ նրանից՝ դա կարվի ֆեյսբուքյան լայվի, թե որեւէ լրատվամիջոցի միջոցով»,-ասաց «Լուսավոր Հայաստանի» ներկայացուցիչը: